Lampe: Oferta no tabata lucrativo pa companianan sigura studiantenan

ORANJESTAD - Pasobra e no tabata lucrativo suficiente comercialmente, 4 compania (di e 5 companianan cu a busca e bestek) no a participa den e destaho publico pa brinda seguro pa studiantenan di Aruba na Hulanda. Asina minister di Enseñansa Rudy Lampe a splica dialuna den conferencia di prensa. E companianan cu a participa den e bestek tabata e.o.Insure to Study, Boogaard Assurantien BV, Ennia, Eon Aruba NV Meos Den Haag, y Atlas Risk Solutions. Pues ta un compania so, esun existente Insure to Study, ta esun cu a duna un oferta recientemente. Y como tal, gobierno a keda obliga pa tuma e compania aki atrobe, aunke cu den pasado esnan cu ta den gobierno actual, tabatin problema cu ne. E otro companianan tabata kier pa tur studiante keda sigura pa periodo total di nan estudio y no pa solamente 5 lunanan cu ta falta pa termina e aña aki. E compania aki lo brinda seguro pa e studiantenan entrante 1 di augustus te 31 di december 2018. Despues di esey, tur studiante por scohe nan propio compania di seguro. Motibo inicial pa termina e relacion cu Insure to Study, segun e mandatario, tabata e.o. kehonan di studiante, y casonan den corte pa cu e compania aki. E mandatario a informa e compania actual na januari 2018, cu ta cancela e acuerdo entrante 1 di januari 2019. 

ARUBALENING

Tur studiante cu ta bay Hulanda cu un Arubalening na augustus  di e aña aki ta segura den e prome 5 luna, y despues di 1 januari 2019 mes mester busca un compania di nan gusto. E suma cu mester paga pa nan seguro, ta 54,50 pa luna, pues 272,50 euro pa e 5 lunanan, y ta wordo kita di nan prome pago di Aruba lening. Desde januari 2019, e studiantenan mes mester paga e segurod di su termijnbetaling.  

KEHO

Motibo pues pa cancela e contract, tabata pa motibo cu diferente mayor y studiante a laga sa cu nan no ta contento cu e hecho cu nan ta wordo obliga pa tuma e pakete di seguro cu nan Arubalening, esaki tabata e ultimo aña cu gobierno a organisa e destaho pubolico pa e seguro di studiante na Hulanda. Segun e mandatario, tur compania interesa por cuminsa prepara desde awor caba pa ofrece mayor y studiantenan nan pakete di seguro pa januari 2019.