Minister Stef Blok a pidi Aruba tambe despensa

DEN HAAG - Minister Hulandes di Relaccionnan Exterior Stef Blok a pidi Aruba tambe despensa pa e declaracionan haci recientemente riba sociedadnan multicultural. E comentario haci inicialmente tabata dirigi na e sociedad y pais Surnam, unda cu el a bisa entre otro cu e pais ta un fracaso y cu sociedad multicultural no por biba na paz hunto. Tanto Aruba como Corsou a sinti nan mes ofendi tambe y a manda un mensahe fuerte den direccion di e mandatario Hulandes. Pues fuera di un despensa pa Surnam, Aruba y Corsou tambe a haya un despensa di e mandatario. 

CARTA PA SURNAM

Den e carta pa Surnam, e mandatario ta bisa cu e declaracionan cu el a haci, e no mester a haci. E ta reconoce cu e palabranan cu el a usa no tabata apropia y cu ta haya importante pa trece su disculpa 'sincero'. E ta haya esaki importante ya cu e ta considera Surnam importante y kier reestablece e relacion diplomatico cu e pais. Surnam mientrastanto oficialmente no a reacciona ainda pero por a compronde cu e pais no a haya e dispensa suficiente y kier su retiro. 

REACCION ARUBA

Manera NoticiaCla a raporta como primicia siman pasa caba, gobierno di Aruba a bisa cu e no ta comparti e expresion di minister di relacionan exterior Hulandes Stef Blok relaciona cu un sociedad multicultural. Asina prome minister di Aruba Evelyn Wever Croes a bisa NoticiaCla for di diahuebs anochi. "E expresionan no ta representativo pa e realidad den e parti Caribense di Reino y tampoco pa e experiencia di ciudadnaonan di Reino for di Aruba na Hulanda", Wever a sigui bisa. "Aruba y Reino ta un solo sociedad multicultural y esey ta nos forza". Segun Wever, e declaracionan di Blok ta implica un suposicion negativo den bista di un sociedad multicultural.  Corsou tambe tabata basta fuerte den su declaracion for di prome minister Ruggenaath.