DOW: Fin di augustus problema di awa na rotonde Cumana ta soluciona!

ORANJESTAD – Pa fin di augustus di e aña aki, e plan di drenahe di awa na e rotonde di ex Codemsa lo ta cla y por mira cambio. Asina director di Dienst Openbare Werken (DOW) Marlon Croes a bisa. Croes a reacciona riba e raportahe di NoticiaCla e siman aki cu un biaha mas awacero a converti e area den un piscina. Segun Croes, trabou ta andando ainda y pesey no a mira e cambio. Pero ora cu e trabou ta cla, e ora por mira e solucion tambe pa e problema di awa cu ta keda para ora di un palo di awacero.

CONGESTION

E problema segun Croes ta cu e rotonde di Cumana (ex Codemsa) ta uno dificil pa traha cune den terminologia di awa, pasobra tin varios caminda ta uni eynan y e structura ta pone cu dado momento awa ta uni y keda para. Entre otro tin e caminda di Santa Cruz unda cu e awa ta bin abou, tin esun di Playa cu ta fin di e rotonde di Dadelstraat cu tambe ta bin eynan, y e bahada di Aurora Funeral Home tambe ta haya awa. “Door cu e rotonde ta forma parti di e elevacion pa cu e fly over cu ta tuma lugar na e caminda di Meiveld patras, e ta hinca den un inclinacion, di banda. Y esey ta pone cu bo tin cu bin cu un plan di drenahe hopi bon pa soluciona e problema di awa cu por sigui” Croes a bisa.

TRABOU ANDANDO

E director ta mustra cu mester ta conciente cu e no ta un trabou cu ta cla ainda. “E ta un punto cu ta den construccion ainda, cu kier men cu no tur facilidad ta cla”. E contratista segun Croes, den e proyecto cu ta responsabel pa e diseño di e rotonde aki y mantencion di e proyecto pa proximo 18 aña, a busca ayudo di un compania Hulandes pa haci e calculacionnan pe y uno Colombiano. Ambos a bisa cu ta bon pa bin cu 4 box pa percura pa e awa bay den subsuelo. Na e rotonde tin 4 skina y den cada cuater skina lo bay ubica un di e boxnan pa percura e awa bay den tera. Esey ta e prome plan cu nan tin. Tambe tin un solucion pa ora cu e boxnan aki yena completo, lo traha ditch mescos cu tin na Tanki Flip na altura di Bowling. Si momento cu e boxnan yena, e lo bay den e ditch y hibe pa nort den direccion di San Barbola. Esey ta e solucion cu lo traha ariba. Tambe na altura di e funeral home lo traha un lineare wateropvang system cu ta coi e awa y hibe den tera di biaha prome cu e yega na e boxnan grandi.

PASENSHI

Ora cu e camindanan keda cla completo, e ora ey e sistema di awa lo por ta soluciona. A palabra na februari cu na fin di augustus di e aña aki (otro luna) e punto aki lo mester ta resolvi, incluyendo di e awa. Nada no ta cla y pueblo por keda trankil cu pa ora cu esaki ta cla, e problema di awa lo ta soluciona, segun Croes.