Minister ta cuestiona imparcialidad di Dept. Recurso Humano

ORANJESTAD – Minister di Salud Dangui Oduber ta cuestiona imparcialidad di e Departamento di Recurso Humano (DRH) di gobierno den un declaracion pa NoticiaCla recientemente. Pues e mandatario ta mustra cu e no tin confianza den e propio departamento di gobierno. E mandatario su cuestionamento ta bin a raiz di e investigacion den funcionamento di e director di Departamento Di Salud (DVG) Jerry Staring recientemente. Aki e minister a pidi DRH haci un investigacion di e departamento di Salud, pero dado momento nan (DRH) a ‘bula afo’. Staring a wordo manda cas pa cu su funcionamento, pero a gana su caso y a bolbe trabou.

E INVESTIGACION

Segun e mandatario, ora cu na juni a pidi e DRH pa haci e investigacion, dado momento e conseho cu a bin bek tabata cu ta inevitable cu DVG mester cuminsa ‘di nobo’. Como tal a conseha pa investiga e departamento di salud. Segun e mandatario, su interpretacion ta cu mester haci un investigacion riba e funcionamento di e director. “Ora cu nos a trece esaki dilanti DRH a trek terug y cu nos a interpreta e zin aki robez” Oduber a bisa. Sinembargo e mandatario ta diferencia di opinion cu DRH. Segun e mandatario ora cu haci un investigacion, ta logico cu ta inclui e director den henter e evaluacion cu ta tumando lugar. “Con bo ta haci un investigacion riba funcionamento di henter e organisacion anto bo ta exclui e director den e caso aki” Oduber a sigui cuestiona. “Mi no por ta di acuerdo cu e advies di DRH” e mandatario a sigui bisa.

IMPARCIAL

Loke e mandatario ta haya mas yamativo den henter e caso aki, ta cu a inclui DRH den e ‘doorlichtings commissie pa tin un partido completamente imparcial, y dos dia pasa nan (DRH) a ‘trek terug’. “Nan no kier participa den e investigacion. Anto e ora pami como minister, ta straña mi hopi cu nos departamento di recurso humano di gobierno no kier participa, den un investigacion pasobra segun nan, e manifestantenan a acusa nan riba nan imparcialidad” Oduber a continua bisando. “Mas bien cu e actitud aki bo ta confirma mi cu bo no por ta imparcial” Oduber a sigui bisa, refiriendo aki na DRH. “Pasobra ki otro argumento bo por dunami pakico no participa den e doorlichtingscommissie cu tin cu yega a raiz di e tur e feiten, pa wak kico tur ta berdad, kico no ta berdad”. E ta lamenta e posicion di DRH, e mandatario a finalisa bisando. Scucha e entrevista AKI.