Minister ta haya cu polis cu a dal hobencita mata mester haya retiro

ORANJESTAD – Si ta pa minister di husticia Andin Bikker, e polis J. Vriend -cu a keda haya culpabel recientemente pa morto di e hobencita Zinnia Croes- mester haya e castigo disciplinario maximo, cu ta retiro di su funcion. E mandatario a bisa NoticiaCla diahuebs mainta durante conferencia di prensa, cu esey ta su opinion personal. Pero e mandatario tin cu warda e conseho di e departamento di recurso humano, cu tin cu bin cu un recomendacion oficial, kico por haci cu e polis aki. E mandatario a bisa anteriormente caba cu dependiendo di e resultado di e caso, cu por a spera mas castigo disciplinario. Recientemente e mandatario a topa cu e famia despues di e sentencia pa e polis responsabel. 

CUSTUMBER

E mandatario den mesun rosea a bisa cu no ta su custumber pa keda bay riba caso individual di ambtenaar, unda cu constantemente mester dicidi riba nan futuro laboral. Pero den e caso aki (tratando di un caso hopi publico), Bikker a confirma na e portal aki cu a pidi DRH pa e conseho. Ta custumber cu ta pasa e proceso aki. E mester bay via DRH cu tin e ‘constitutionele geheugen’ pa atende cu tur dossier di tur ambtenaar.

DETAYE

Ora cu e caso di e polis en cuestion a keda presenta, a bin un detaye (un hecho) nobo substancial, esta cu e persona a keda condena, inmediatamente a pidi pa wak a base di e circumstancianan nobo aki, kico ta e castigo disciplinario cu por wordo impone. A tende e expresionnan den comunidad cu e castigo impone riba e persona en cuestion tabata mucho liviano. Pero cu e hecho palpable, a pidi e conseho. “Nos ta en espera di e advies di DRH” Bikker a bisa. Ora cu a puntra e mandatario si enberdad el a pidi specificamente pa kita e polis for di trabou, Bikker a bisa “Mi opinion personal ta cu un persona asina akinan lo mester haya e paso disciplinario maximo”, indicando cu mester kite for di trabou. Pero e ta depende di e proceso y e resultado di e conseho di DRH.