Botica di Servicio tin Stock di e Vacuna Contra Keintura Geel

ORANJESTAD: Recientemente Seccion di Malesanan Contagioso (Dienst Besmettelijke Ziekten) a informa cu e vacuna conta Keintura Geel (Yellow Fever) a caba. E vacuna aki ta mandatorio pa tur pasahero cu ta bin for di Centro America, Sur America y paisnan den e continente di Africa.

Cu esaki Botica di Servicio kier a anuncia cu tin suficiente stock di e vacuna contra Keintura Geel. Pa e motibo aki a bin un colaboracion entre Botica di Servicio Eagle y Seccion di Malesanan Contagioso. Botica di Servicio Eagle a manda algun di su stock na Seccion di Malesanan Contagioso.

Si algun persona mester di e vacuna aki nan lo mester pasa Botica di Servicio Eagle prome y asina paga pa esaki. (Esaki ta Afl. 125,- pa vacuna). Despues cu paga esaki lo mester hiba e recibo na Seccion di Malesa nan Contagioso (como cu esaki lo ta e prueba di pago) y asina lo por ricibi e vacuna.

 E cliente lo mester paga Afl. 10,- pa e buki geel (cu ta e prueba internacional di vacuna). E colaboracion aki lo continua te ora Seccion di Malesanan Contagioso ricibi e vacuna den stock atrobe.