Gobierno a haya te diabierna pa cumpli cu ultimatum di CAN

ORANJESTAD – Comision Accion Nacional a dicidi di honra e peticion di gobierno pa prolonga e ultimatum riba tarifa di aumento di coriente, di diaranson pa diabierna awor. “Nos por ta habri pa sinta hunto” e lider di e grupo, Hendrik Tevreden a declara na e matutino Bon Dia Aruba. Segun Tevreden, di e forma ey e ta exprea e boluntad di nan partnernan pa mantene e canal di dialogo habri. Gobierno pa medio di minister Otmar Oduber a declara na NoticiaCla.com caba cu ‘mas tarda diabierna awor’ lo CAN tin un contesta.

Loke ta intersante ta e forma con e confirmacion pa e prolongacion a bin. Via sindicato ABV, gobierno a pidi e grupo CAN pa un plaso extra pa por cumpli cu e ‘ultimatum’. Sindicalista Gina Maduro di ABV a canalisa e solicitud di gobierno den seno di CAN, pa pospone e ultimatum di diaranson merdia. Mes momento Tevreden no ta contento si con e proceso aki a bay. Sigur si mira cu segun e mandatario, Tevreden ‘lo no tabata alcansabel’ henter weekend, siendo cu prensa si tabata haya contacto cune. Segun Tevreden, esey ‘no ta mustra seriedad’ y cu ‘tipo di comentarionan asina no ta contribui na nada, y cu e minister no ta serio cu e pueblo’.

Tabata dialuna ultimo cu CAN a manda un ultimatum pa gobierno. “Gobierno tin te diaranson merdia 12’or pa bin cu un contesta riba e aumento di tarifa di coriente. Si pa e ora ey no tin contesta, Comision Accion Nacional hunto cu otro stakeholdernan, lo evalua nan siguiente pasonan”. Esey e comision a manda bisa gobierno pa medio di un carta dialuna (lesa e carta aki) . A compronde tambe for di un di e stakeholdernan cu ta miembro di e comision di 7, pa prepara pa ‘mas entre overtime pa polis’, mas riot comando, ‘pasobra nos ta bin pa boso’. Asina un di e miembronan di e grupo di 7, cu ta considera como un 'stakeholder' , Micheal Williams a declara na radio dialuna merdia. Esaki a duna indicacion pues cu nan ta preparando un otro manifestacion, aunke cu Cuerpo policial siman pasa ainda a sigura cu no tin ningun otro manifestacion planea mas.

E carta cu C.A.N. a manda dialuna pa gobierno, ta repasa e susesonan di e ultimo lunanan, cu ta basicamente referi na falta di accion di parti di gobierno, como resultado di dos diferente manifestacion. Tanto e manifestacion na september, di grupo di 7 como esun ultimo di CAN, siman pasa diaranson a keda sin un contesta di gobierno. Como tal nan ta sinti cu mester pone mas presion riba gobierno, pa cumpli cu e promesa di ‘zo spoedig mogelijk’, manera cu e comision a tende diahuebs anochi for di gobierno despues di nan reunion cu CAN.