Oduber: Mester determina gastonan extra ainda pa solucion di huma di WEB

Oduber: Mester determina gastonan extra ainda pa solucion di huma di WEB

Posted on 07/18/2018 5:11 pm AST | Updated on 07/18/2018 5:11 pm AST

BALASHI – Despues cu WEB a scucha e kehonan di e.o. ASTEC y douane riba e tereno di waf di Barcadera pa cu e huma di WEB, y a papia cu esnan envolvi pa evalua diferente scenario pa alivia e situacion, director di e compania di utilidad Luis Oduber a bisa diaranson mainta cu tin varios solucion, basa riba termino cortico, termino medio y termino largo. Loke no sa ainda, ta cuanto esaki lo costa nan, esta WEB.

TERMINO CORTO

Ora cu papia di termino corto, Oduber ta papia di 2 pa tres luna, y cu esaki por tuma efecto posiblemente mitar of fin di luna di augustus caba ora cu un cargamento ‘diferente’ di fuel oil yega Aruba. Ta papia aki di e.o. uza un fuel oil cu max 1.5% di Sulfur en bes di 2.8% ; negocia contract vigente cu FMSA, cu ta e compania for di cual ta haci e compra. A bisa pues cu loo tuma 2 pa 3 luna pa haña e fuel aki. Tambe lo mester evalua su uzo / gasto. Ademas Oduber a bisa cu lo aumenta midimento di emision na WEB y na Barcadera durante minimo 1 aña y despues analisa resultado di cada medida pa yega na un solucion permanente.

TERMINO MEDIO

Pa loke ta e termino medio, Oduber ta kere cu esaki lo ta pa aki 1 aña y mei. Ta papia aki di instala 6 motor RECIP nobo/adicional pa reemplaza boiler y turbinanan existente. Tambe pa uza fuel oil calidad halto cu ta contene maximo 1.5% Sulfur. Segun Oduber, e motornan RECIP ta mas eficiente y lo reduci uzo di fuel oil y asina reduci emision di gasnan manera Sulfur.

TERMINO LARGO

Y finalmente e solucion pa termino largo, Oduber ta referi pa aki 4 aña, unda cu ta premira cu lo e ora ta cla pa haci e transicion di fuel oil pa Gas Natural y unda cu lo reduci nivel di emision pa practicamente zero.

DESICIONAN PENDIENTE

Ta keda awor decisionnan cu WEB tin cu tuma, cu ta e.o. pa determina con largo WEB lo por carga e gastonan imprevisto di HFO, y ta premira cu den e proximo 2 pa 3 luna lo mester trece mas claridad pa tuma e decision corecto.

  • Powered by SETAR