A opta pa mantene management team actual mes di Telearuba

ORANJESTAD – Gobierno a opta pa no cambia e management team na Telearuba y a laga esaki ‘intacto’. Asina minister di telecomunicacion Chris Romero a contesta parlamentario Sue-Ann Ras (MEP) e siman aki.  Esey kier men cu Giovanny Kock y Rona Emerencia-Tromp mes ta keda por lo pronto na timon di e canal. E informacion aki ta un di e contestanan riba e preguntanan di e parlamentario. Ras a haci e mandatario un serie di pregunta riba e canal recientemente y e siman aki a ricibi contesta riba su preguntanan y entre nan esun di e management team. 

DIRECTOR TELE ARUBA

E hecho cu a opta pa mantene e management team por lo pronto, no kier men si, cu nan ta keda ‘pa semper’. ‘Na momento cu aproba un structura di organisacion nobo, lo cuminsa proceso di solicitud habri pa e posicion di director di Telearuba’, e mandatario a sigui contesta e parlamentario. Prome cu a pone e management team aña pasa, Andre Schouten a fungi algun tempo como director. Pero prome cu cambio di gobierno, e mes a opta pa retira, y e ora gobierno anterior a pone Kock y Emerencia na top di e canal. Ambos ta bin di Setar y uno di tin experiencia den finanza y e otro den mercadeo.

DEBE TELE ARUBA

E mandatario a confirma tambe den su contestacion, cu e canal tin un debe miyonario di 1.3 miyon florin cu ta gran parti di debe habri, y tambe pa falta di competencia di social media. Esaki ta haci e canal menos atractivo pa comerciantenan y como cu no a haci hopi pa keda ‘up to date’, esaki aparentemente ta afectando e entrada. E mandatario a confirma si cu ta bay restructura e programacion y separa e programacion di canal 13 y 23. E intencion tabata pa comberti canal 23 den uno turistico y separe completo di 13. Pero no ta conoci con a para cu e parti ey. Por lesa e contestanan riba e preguntanan AKI.