Dowers: Contento cu despues di 5 aña, cantidad di curso di calidad tuma lugar atrobe

ORANJESTAD: - Recientemente tabatin e ceremonia di graduacion di un grupo di guardia di KIA, kendenan a sigui Opleiding VO 2, cual a wordo organisa door di e staff di Ministerio di Husticia. Minister encarga cu husticia Arthur Dowers a bisa cu mientras cu e ta felicita e graduadonan, mesun momento ta admiti cu a wanta basta tempo prome cu por a cuminsa cu e opleiding aki, "Pero mi ta contento cu nos a haci esey pasobra awor nos a haci un opleiding di calidad. Boso a siña cierto cosnan cu boso por pone den practica y e diploma cu boso a haya tin su balor."

Segun Dowers casi cinco (5) aña pasa el a wordo confronta cu e hecho cu tin un cantidad grandi di opleiding ta pega. A haci un investigacion y a constata cu simplemente no tabata organisa e cursonan y tabatin problema di contenido di e cursonan. "Tabatin cosnan cu no tabata bon regla y cu no tabatin pa sigui uza e mesun tipo di curso despues cu tanto aña pasa nan a wordo traha." Esey tabata e motibo cu a cuminsa traha riba curso cu material y informacionnan nobo, bou guia di Carmen Tromp, Shirley Pope, sra. Analuz y Dick van Leenen. "Pesey mi ta orguyoso di e diploma cu ta wordo entrega awe. Boso por ta orguyoso di e diploma aki pasobra boso a traha duro p'e y e tabata un opleiding exitoso." Luna pasa dos curso organisa pa miembronan di CEA a finalisa, mientras cu otronan a cuminsa. Na januari awor tin otro curso mas pa personal di KIA.