Teller Mericano di banco a bay Aruba despues di yuda cu atraco

YONKERS, NY — Un ex teller Mericano di un banco na Merca cu a biaha pa Aruba cu un atracador di banco despues di a comete e atraco violento, a wordo haya culpabel dialuna di a participa den e robo. Geoffrey S. Berman, e fiscal pa districto di New York, a anuncia cu Virginia Blanco tabata culpable di tur tres acusacion contra dje, refiriendo na e atraco riba e filial di banco Wells Fargo na Yonkers in 2013. E veredicto a bin despues di 4 dia di a trata e caso dilanti un hurado y e huez Cathy Seibel. No ta prome biaha cu hendenan Mericano ta comete un crimen di un tipo y djey ta usa e placa pa bin Aruba y pasa vacacion. 

INSIDE JOB

Segun e informacion, e atraco/robo tabata un ‘inside job’ , y cu ayudo di e dama, e atraco violento tabata posibel. Blanco tabata traha na e banco como teller. El a yuda Giovanny Marte pa horta e banco door di dune informacion crucial cu a laga Marte y algun otro persona tira e atraco. Nan a tira e atraco arma, lansando tiro aunke no a herida ningun hende y a bay cu un botin di riba 300 mil dollar.

ARUBA

Usando e placa horta, Blanco y Marte a biaha pa Aruba pa un vacacion. Blanco (29) ta keda sentencia dia 19 di October proximo. Pa e cargonan cu e ta sentencia pe, e por haya bida largo di prison.