Grupo di taxista descontento cu minister pa cambio riba acuerdo haci

ORANJESTAD – Un grupo di taxista no ta contento cu minister di transporte Chris Romero y a vocifera esaki den un conferencia di prensa diamars mainta. Segun e grupo su vocero Linda Orman, nan a keda sorprendi cu e lista di tarifa nobo presenta, cu no ta ilustra e acuerdo cu nan tabatin cu e mandatario y departamento concerni. Den mesun rosea, durante e conferencia nan no tabatin certeza si e mandatario mes ta na altura di e ‘cambio’, of si ta e departamento di transporte publico DTP a haci e cambio sin conocemento di e mandatario.

PALABRACION

Segun e grupo, a palabra cu minister y tur esnan envolvi pa un tarifa husto, y a yega na un acuerdo pa presenta e lista di tarifa nobo. Pero pa sorpresa di e taxistanan, ora cu e lista nobo a sali oficialmente, e no tabata esun cu a keda palabra cu e taxistanan. Entre nan tambe a bin resulta cu a haci cambio na reglanan cu e taxistanan no por ta contento cu ne. Entre otro e parti unda cu ta dicidi unilateralmente na aeropuerto pa uni dos diferente grupo/famia den un solo taxi, y cu tin cu comparti e tarifa entre e dos gruponan. Algo cu e taxistanan awe mainta a mustra di no kier acepta.

CONOCEMENTO DI MINISTER

Mientras cu e rabia tabata destina pa minister di transporte Chris Romero, nan no por a bisa si e cambio a sosode cu aprobacion di e mandatario. Por bien, segun e grupo, cu e departamento a implementa e cambionan sin cu e minister ta(bata) na altura. Segun e comparacion duna di Orman, un director di orchestra ta dirigi su orchestra, pero ora cu e bras section dicidi di blas otro cos, henter e presentacion ta sali di harmonia y ta bira un problema, indicando cu posiblemente e mandatario no tin control riba su departamento. No ta conoci kico e siguiente pasonan lo ta pa cu e asunto aki.