Minister Boekhoudt: Necesario pa bin cu bon fundeshi pa confiansa mutuo

DEN HAAG – Den interes di Reino ta necesario pa bin cu un bon fundeshi pa confianza mutuo entre e partidonan. Minister Plenipotenciario di Aruba na Hulanda, Alfonso Boekhoudt recientemente a bisa esaki na final di su discurso, durante un presentacion di Genootschap Nederland Aruba. Segun Boekhoudt, e ta referi na un instancia independiente cu ta encarga cu resolve disputanan huridico ariba interpretacion di Statuut. ‘Di e manera aki lo por evita cu - manera awor aki ta e caso – cu disputanan netamente huridico por escala y bira disputanan politico complica. Esaki ta haci e caminda liber pa cooperacion voluntario na bienestar di e pueblonan,’ segun Minister Plenipotenciario Alfonso Boekhoudt na e encuentro di GNA.

Durante e encuentro anual di Genootschap Nederland Aruba (GNA) cu a tuma lugar den fin di siman cu a pasa, Minister Plenipotenciario Alfonso Boekhoudt a tene un presentacion recientemente. E mandatario den su discurso a delinea pakico tabata necesario pa Gobierno di Aruba pa bin cu un vision ariba Reino. Esaki segun Boekhoudt, pa motibo cu Statuut di Reino Hulandes ta existi e aña aki 60 aña. Sinembargo den Reino Hulandes nunca a desaroya su mes den un `partnership´ strategico entre e paisnan den Reino. ´Aruba desde 2010 ta inverti hopi esfuerzo pa trece un cambio den esaki. Ta un realidad cu hopi paisnan grandi ta busca mancomunidad. E paisnan aki ta realisa nan mes cu esaki a lo largo ta e manera di sobrevivi den e era di globalisacion. E unico manera pa haya mas grip ariba e circumstancia y factornan cu ta forma un risico pa un pais individual, ta pa saca benificio di e oportunidadnan cu globalisacion ta trece cune,´ Boekhoudt a sigui bisa.

Segun Boekhoudt, Aruba a mira e oportunidad cu partnership strategico cu Reino Hulandes ta brinda. Pa yega asina leu ta exigi si un cambio den mentalidad na Aruba mes, pero tambe den e otro partinan di Reino Hulandes. Segun e mandatario Aruba a hunga un rol hopi grandi den esaki y na diferente manera a boga pa un acercamento nobo den Reino Hulandes. ´Aruba a cuminsa cu e proceso na cual e parti Caribense lo fungi como gateway entre Europa y America Latina. Nos ta papia di e funcion di ta un brug entre e dos continentenan cu lo beneficia no unicamente companianan Hulandes, pero tambe e economia di Aruba. Un situacion caminda tur partido ta sali gana dje, cu ta crea un dimension nobo pa Reino Hulandes, basa ariba valornan economico cu e posicion strategico di e paisnan di Reino den Caribe ta brinda.’ Pa logra esaki, segun Boekhoudt, cooperacion entre Aruba cu Hulanda ta crucial. Pesey tambe cu, por ehempel participacion conhunto na misionnan comercial, manera esun durante di Europe Meets the Americas, ta di sumo importancia pa nos isla. Foto ta cortesia di Nico van der Ven.