Oduber: DOW a confirma cu proyecto na costa di Savaneta ta para

SAVANETA – No tin ningun trabou di construccion tumando lugar na e costa na Savaneta. Asina oficina di ministerio di infrastructura a sigura den un comunicado dialuna. E ta referi na e proyecto di Old Man & the Sea. Segun e ministerio, recientemente a tuma nota di imagennan cu ta circula den medionan social y prensa relaciona cu trabounan di construccion cu lo ta tumando luga na costa di Savaneta cu ta encera posibel desaroyo pa atraccion turistico. E imagennan aki a lanta hopi pregunta y preocupacion den comunidad cu ta preocupa pa destruccion di nos naturalesa. Pero tur esaki a keda pues desmenti, particularmente pa DOW.

PARA PROYECTO

DOW a informa cu e proyecto / trabounan ta para y tur locual cu tin construi na e sitio ta para for di 2016/2017 caba. DOW a pidi cooperacion di e desaroyadornan kendenan a coopera y a para nan operacion. Departamentonan di DOW y DIP a bay controla esaki un bes mas despues cu video y imagennan a cuminsa circula. E situacion ta, cu e desaroyador a haya algun permiso anteriormente y a base di esaki nan a incia cu trabounan di contruccion ‘vooruitlopend’ prome cu nan a haya tur nan documentonan pa cual a mustranan cu esaki no por. Primordialmente pa motibo cu tin estudionan di impacto riba medio ambiente cu mester tuma lugar y cual mester ricibi conseho di esaki. Considerando e proteccion cu tin y cu kier brinda pa diferente area rond Aruba mester mira e impacto cu cualkier desaroyo por tin prome cu duna cualkier tipo di acuerdo pa tipo di desaroyonan asina, minister Otmar Oduber a segura.