Desaroyadornan proyecto Isla di Oro evaluando nan opcion

ORANJESTAD – E desaroyadornan di proyecto Zoetry ( na Isla di Oro) no ta ‘give up’, despues cu gobierno recientemente a oficialmente para e proyecto ambicioso di un boutique hotel riba laman. “Nos ta pensando riba nos proximo plan pa sigui dilanti” asina e desaroyado Franz Sydow a bisa NoticiaCla. “ Nos lo kier continua cu Zoetry pa Aruba pero ta evaluando nos opcionnan. Ta 5 aña a pasa y nos a inverti basta placa caba (den e proyecto)” Sydow a sigui bisa. Unabez cu nan ta cla cu e alternativa, lo bolbe informa e portal aki. Pa awor, nan ta pues evaluando nan plan. Importante ta cu nan no a ‘tira e cerbete den ring’.

PARA PROYECTO

Tabata mitar di luna pasa (14 di juni) cu gobierno a dicidi pa no aproba peticion pa construi e proyecto hotelero na Isla di Oro. Asina e mandatario di infrastructura Otmar Oduber a informa e atardi ey. Segun e mandatario, despues di un trayectoria largo cu e proyecto aki a pasa aden, y tumando e consehonan referente e importancia ecologico di e area aki den consideracion, a dicidi di no aproba e peticion pa por construi e hotel na e area aki. Esaki teniendo e bienestar di nos hendenan y nos medio ambiente na cuenta. Por indica cu pa loke ta trata e desaroyo economico di Pais Aruba y tambe e importancia pa atrae e bishitante mas afluente cu berdaderamente lo por contribui na e economia di Aruba, esaki lo keda un punto di importancia.

NO POR PARA PROYECTO

Di otro banda, tabata na maart di e esun aña cu e desaroyadornan a bisa NotiicaCla cu e posibilidad pa para e proyecto di Zoetry Isla di Oro (un inversion di 50 miyon dollar), no tabata un opcion aworaki. E contesta tabata a raiz di e pregunta di e portal aki, mirando e tardanza cu tabatin pa cu e proyecto. E proyecto ta encera desaroyo di Isla di Oro den un proyecto hotelero estilo bungalow riba awa. Sydow a comparti e resultado di e investigacion di medio ambiente riba e area, y a mustra cu e resultadonan no ta sorprende. ‘Resultado ta bisa cu algo mester wordo haci. E area ta den peliger, e mangrove ta muriendo, e coralnan ta na peliger’. Sydow a splica e tempo ey cu esey ta loke e resultado di investigacion haci riba e parti di medio ambiente rond di e area pa wordo desaroya, ta bisa.