Booshi Wever: Inversion den Radisson hotel lo ta ‘flinke aderlating” pa fondo di APFA

ORANJESTAD – “E inversion den e compra y renobacion di Radisson Hotel ta bay resulta den un “flinke aderlating” atrobe pa e fondonan di APFA, ya cu nos no mag di lubida cu ya caba a inverti na grandi den e proyecto di nos hospital”. Na palabra, lider di partido UPP (Union Patriotico Progresista ) Booshi Wever. E lider politico ta precupa cu e inversionnan na caminda haci pa Aruba Growth Fund lo perhudica e fondo di e.o. APFA. “Mi ta spera cu e sindicatonan cu nan miembronan ta aporta den APFA, y e representante di e pensionistanan den e comisariado di APFA, ta na altura di e desaroyo aki, y cu tambe nan a haña un splicacion den forma di un ‘feasibility study’ di e inversion aki” Wever ta sigui bisa. E ta bisa esaki mirando cu e fundacion ta ricibi su fondonan di e.o. APFA, pero den e caso aki Wever ta relata solamente na e parti di APFA.

Segun Wever, APFA tin di inverti pa por logra un ‘dekkingsgraad’ di 100%, pero cu awor aki ta alrededor di 76%. “ Pa por drecha e ‘dekkingsgraad’, APFA a yega na un acuerdo cu gobierno, cu lo bay hinca 170 miyon den e fondo. Pero APFA mester sigui inverti y tin e obligacion pa ley pa inverti 33% den proyectonan internacional y 67% nacional”.

Ademas Wever ta precupa cu e empleadonan di e hotel. “Sr. (Otmar) Oduber ta bisa cu e grupo local ta garantisa empleo pa e trahadornan di Radisson. Despues di a bin ta ripara e desaroyonan cu a tuma lugar na Westin Hotel, mi tin e tendencia pa ta por lo menos hopi cauteloso pa no crea espectativanan cerca e empleadonan cu despues posiblemente no ta wordo cumpli” Wever ta sigui bisa. “Ohala cu mi dudanan den e asunto di empleo por resulta di no ta berdad. En todo caso nos ta desea e empleadonan hopi pasenshi den e proximo lunanan, y pa despues hopi exito cu nan operador nobo.” Wever ta finalisa bisando. Segun Wever, e situacion financiero di Aruba ta pesimo, y mester trata di evita posibel ‘mal inversion’, manera a socede den pasado, cu a resulta den un caida grandi di e ‘dekkingsgraad’ di APFA.

Tabata dialuna ultimo cu e noticia a bira conoci cu un grupo di inversionista local bou di e nomber di Aruba Growth Fund, lo cumpra e edificio di Aruba Radisson Hotel. Minister di turismo Otmar Oduber dialuna mainta a confirma e noticia aki cu tin basta siman caba ta circulando como rumor. Di parti di e hotel mes, nan no kier a duna comentario riba e noticia aki. “Bo tin cu check cu e minister encarga cu turismo y e hendenan di e fondo” tabata declaracion di e gerente general di Aruba Radisson, Mark Lyttleton Frances. “E propiedad no ta duna comentario”, Lyttleton a sigura NoticiaCla.com

Mientrastanto Oduber ta considera e noticia aki como uno positivo, unda cu hendenan local mes lo percura pa e futuro sigur di e trahadonan. “E grupo cu a keda escohi ya ta papiando cu e operador nobo di renombre mundial, cu lo opera na Aruba” Oduber a bisa. Segun Oduber, e grupo cu ta tuma over, ta un partner cu Aruba ‘lo kier traha cune y esaki ta agrega un added value pa e producto Aruba sigur”, Oduber ta sigui bisa.

NoticiaCla.com recientemente a combersa cu un di e personanan di e fondo, conocido comerciante Rene Kan, cu a confirma cu tabatin interes pero no por a bisa mucho mas e tempo ey. Pa loke ta e fondo mes, esaki a keda establece na 2012, inicialmente pa e tres conocido inversionistanan Milton Berlinski, Rene Kan and Justus Martens, y awe ta conta cu 9 persona cu ta forma parti di e ekipo. For di directornan general pa consehero y mas, y ta e prome fondo di capital priva na Aruba, cu a ricibi su prome fondo di e fondonan di pensioen di Aruba y otro companianan local respeta manera WEB, Elmar y MetaCorp. Nan meta ta pa inverti den companianan estableci localmente na Aruba. Loke ta haci nan unico, ta cu nan ta consisti di un grupo completamente local, cu ta inverti solamente den companianan local y ta wordo maneha pa gerentenan di inversion local. E ekipo ta uno hopi experencia, segun su website, y ta traha den un forma hopi liher y profesional. Segun Kan, tur inversion ta wordo haci di un forma responsabel y ningun fondo lo core peliger den cualkier inversion. Ademas, e hecho so cu tin un grupo di local manehando y invertiendo den un producto di e calidad manera Radisson, ta solamente positivo.