Vacuna contra Keintura Geel a caba!

ORANJESTAD - Seccion di Malesanan Contagioso (Dienst Besmettelijke Ziekten) a informa diabierna cu e vacuna contra keintura geel (yellow fever) a caba.

E vacuna contra keintura geel no ta uno facil pa haya debi na e diferente epidemianan cu tin. Esaki ta haci cu e proceso pa haya e vacuna bek na Aruba lo por tarda por lo menos 3 siman. Ta premira cu mas tarda fin di augustus of poco mas trempan lo tin e vacuna disponibel atrobe. Manera cu ricibi esakinan nos lo informa comunidad mesora.

Ta bon pa mentiona cu pa anja normalmente ta aplica 600 vacuna, pero e anja aki te cu awor a aplica mas cu 5000 caba, pues un diferencia grandi compara cu e anjanan anterior.

Seccion di Malesanan Contagios ta conseha tur persona cu ta bay biaha pa paisnan unda cu tin keintura geel pa proteha nan mes door di uza repelente contra sangura regularmente y bisti paña cu manga largo y carson y si na bo regreso bo presenta cu sintoma di keintura, acudi cerca bo dokter di cas mas pronto posibel.

Pa mas informacion por tuma contacto cu Seccion di Malesanan Contagioso (DBZ) na 522-4200 situa na Avicena straat # 2, Oranjestad. Mainta cuminsando di 7:45 pa 11:45 y parti atardi di 1:45 pa 3:30.