Croes: Comerciante cu cobra .36% extra pa cubri gasto, ta normal

ORANJESTAD – E discusion den comunidad riba e hecho cu cierto comerciante ta cobra mas cu 6% di impuesto despues di 1 di juli, tin su motibo segun economista y miembro di directiva di Camara di Comercio Randal Croes durante un conferencia di prensa diahuebs. E ta referi na e .36% extra cu cierto di e comerciantenan ta cobrando cu ,- segun Croes -, ta algo completamente legal. Gobierno mientrastanto a informa NoticiaCla cu dept. di impuesto ta na altura y ta bay wak con por ‘remedia’ e situacion. Algo cu segun Croes, no ta necesario.

VERREKEN

E loke cu comercio ta haci, esta di ‘verreken’ impuestonan impone pa gobierno, no ta nada malo ni illegal pues. Asina Croes a bisa. E ta referi pues na e parti di reclamo riba e ‘extra cobranza di 6.38% envez di 6%. Pa Croes, esaki ta masha normal y no por culpa e comerciante. De hecho, segun Croes, un negoshi tin cu sobrevivi. “Si bo impone gasto extra, e tin cu sake bek di un forma y ta keda na dje con pa hacie”, Croes a sigui bisa.

COBRANSA

Croes a recorda tur hende cu cu (Belasting op Bedrijfs Omzet) BBO ta un impuesto ariba benta, manera e nomber ta indica. “Pa e empresario, e diferencia entre BBO y aumento di gasto di coriente, di invoerrechten y di gasoline ta cos cu si bo negoshi sobrevivi y bo trahadornan sigui cobra y paga nan hipoteca, bo mester recupera e gasto den e producto cu bo ta bende. Sino bo negoshi ta bay atras” Croes a splica. Croes a sigui splica cu BBO ta un gasto cu mester hinca den prijs pa bo por cumpra stock nobo. Ora cu un gobierno bin cu medida, creando mas gasto pa e comerciante, tin dos cos cu e comerciante por haci. “Un supermercado por pasa dia ta cambia prijs di tur producto, of ta hinca e cambio den computer y ta calcula e prijs nobo na ora di benta. Esey ta tur” Croes a bisa.

OMZET

Ora cu un comerciante calcula su ‘omzet’ di 100 mil florin riba cual mester paga 6%, bo ta wak pa riba e 100 mil, bo pone 6%. Pero ora cu bo haci esey segun Croes, bo a cobra 106 mil florin. E tarifa ta bira e ora 6% di 106 mil florin. Pa e comerciante recupera e gasto, mescos cu e ta haci cu gasto di gasoline, of otro gastonan, e ta djis pone 6.36% pa placa drenta den su caha, pa ora cu gobierno bise ‘ bo no debe mi 6 mil riba 100 mil, bo debe mi 6 mil y tanto ariba 106 mil cu bo a bende, pasobra e 6 mil cu extra cu bo a pone den factura, gobierno no ta considera esey como impuesto. Gobierno ta considere como entrada. E ta bruto omzet cu bo a deposita na banco” Croes a bisa. Como tal, e .36% cu ta riba e 6% ta pa e comerciante recupera casi 100% di e aumento di bo gasto di operacion di negoshi cu e 6% a causa” Croes a splica detayadamente. E ta un practica completamente legal segun e economista. Gobierno ta bisa e comerciante, cu e por cobr’e con cu e kier. E por pone den e prijs of no. E unico cos cu a cambia ta cu ora cu a bin cu BAZV, a obliga e comerciante di pone riba e factura, loke antes no tabatey. Scucha e splicacion AKI.