Wever: Anuncio di ampliacion di orario no ta cambia nada pa e trahador

ORANJESTAD – E hecho cu e anuncio di ampliacion di orario di tiendanan pa mas lat no a bay cu e informacion necesario, esaki a causa un confusion innecesario. Mientras cu e anuncio di diaranson cu gobierno ta aumenta e oranan di tienda na Aruba pa habri a cay manera algo inespera den comunidad, no tin motibo pa panico. Asina minister di Economia a.i. Evelyn Wever Croes a bisa diahuebs. E ta papiando na nomber di colega Xiomara Ruiz cu ta di vacacion. Segun Wever, basicamente nada no ta cambia cu e anuncio, pa loke ta e cambio di orario. E ta basa meramente riba tradicion cu tin cu tiendanan ta pidi un excepcion cada aña pa tene nan tienda mas habri.

IMPORTANTE

A mustra cu e cambio aki ta conta solamente pa tiendanan cu tin oportunidad (para den ley) pa no sera ora regular sino mas laat. Importante tambe ta cu esaki no ta conta pa dianan di fiesta of dia di religion. “E no a conta (pa esey) den pasado y e lo no conta awor den futuro pa esaki”. Ademas tur trahado mester sa cu nada no ta cambia pa loke ta e funcion di e trahado. Pues no ta asina cu e trahado tin cu bay traha mas ora awor debi na e cambio aki. Mescos cu den pasado, si e trahado kier traha durante e ora cu e tienda ta habri den ora adicional, e ta haci esaki. Si e no kier, e no ta obliga.