Recordando e icono Arubiano, Oscar Henriquez (dfm)

ORANJESTAD – E noticia riba NoticiaCla di fayecimento di conocido comerciante y gobernante Oscar Henriquez diaranson anochi a pone hopi hende para keto diahuebs. Hopi no tabata sa cu e tabata malo, te pa e fayece, no obstante su edad respeta di 91. Hopi biaha nos tabata sa di dje pa medio di un di su yiunan mas conoci, Tisa (LaSorte) of Angiolina. Su amigonan di cas manera Michael Kuiperi tabata esnan cu mas e tabatin amistad cune. Manera cu NoticiaCla a raporta caba, e tabata malo pa un siman y mey y su situacion rapidamente a empeora te cu su morto diaranson. Henriquez tabata considera como un icono den mundo di turismo, y pa cual tin hopi recuerdo tangible y otronan como recuerdo cu e ta laga atras pa nos. Hopi a conoce pa su labornan politico gubernamental y otronan pa su labornan comercial. Den nos raporta anterior, nos a repasa parti di su logronan mas conoci, riba e.o. tereno di turismo.

GOBIERNO

Oscar Henriquez a cuminsa su carera na gobierno na 1947 na departamento di finanzas. Na 1953 el a bira hefe di dept di Finanza na Aruba. El a bira parlamentario na 1955 y a ocupa e funcion aki te 1961 durante cual el a ocupa funcion manera parlamentario, diputado di finanza, economia, turismo, salud y utilidad. Na 1958 te 1961 e tabata gezaghebber interino, banda di e funcion di diputado. Di 1962 pa periodo di un aña el a bira minister di Finanza, y progreso di Antias. Un aña despues, el a haya e funcion di gezaghebber di pais Aruba.

COMERCIO

Den comercio tambe Oscar Henriquez tabata activo. Di 1973 pa 1988 e tabata director di SEL Maduro & Sons Aruba, mientras cu na 1975 el a te hasta bira director di e compania madre na Corsou, cu ta algo cu el a haci te 1984. (Pa Aruba si el a keda na cabez te 1988). Na 1988 el a lanta e famoso Pelican Adventures NV, di cual Pelican Tours tabata e parti mas popular. Den gremionan comercial tambe e no a falta. Di 1974 e tabata miembro di directiva di Camara di Comercio di Aruba pa un aña largo, y entre 1986 pa 1989 e la fungi como Presidente comisario di Banco Central di Aruba.

CONDECORACION

Oscar Henriquez a keda condecora como officier in de Orde van Oranje Nassau pa Hulanda, Grote Kruis di Venezuela y Republica Dominicana y a haya e yabi di Washington, Merca. Pa cada un di nos, Oscar Henriquez a nifica algo. Cada un di nos tin nos memoria di dje. Un cos ta sigur. Aruba a perde den Oscar Henriquez, un icono riba turismo, un pionero, cu a laga su marca atras pa hopi corde pa semper. Oscar Henriquez, sosega na paz.