E portal ‘E Arubiano’ mester rectifica declaracion contra Staring

ORANJESTAD – E portal di noticia ‘E Arubiano’ tin tres dia pa rectifica un articulo contra director di dept. di Salud Jerry Staring, sino tin cu paga un multa te maximo di 25 mil florin. Asina corte a dicta diahuebs mainta segun e sentencia cu NoticiaCla tin den su poder. Staring a hiba e portal y su propietario corte, pasobra e portal a publica un articulo infunda cu ta atacha e credibilidad y bon nomber di e director. E portal a nenga di haci tal, cu consecuencia cu a bay para den corte. Falta di prueba di e acusacion, falta di investigacion pa hustifica acusacion di e fuente di e articulo, y falta di duna e director chens pa reacciona, a conduci na un sentencia na fabor di e director.

E CASO

Staring a pidi e portal su director (Farrah Boekhoudt) pa rectifica un articulo publica dia 25 di mei ultimo. E articulo tabata uno cu Staring a considera negativo, yen di informacion incorecto. Ora cu a acerca e portal, su director a informa cu e articulo ta basa riba un documento anonimo di trahadonan disgusta, y tambe informacion ricibi di un trahado cu ta representa un sindicato, esta Jayburt Dijkhof riba e tema. Sinembargo e informacion di tanto e carta anonimo como esun di Dijkhof, no ta cuadra cu hechos segun Staring, pa cual e kier a haya un rectificacion. Corte a sita na banda di Staring, argumentando cu e portal y e persona Dijkhof no a substancia nan informacion suficiente y como tal no por considera e informacion publica como ‘hustifica’, y cu e hechos presenta no ta corecto, cu Boekhoudt no a haci su investigacion manera mester ta, y no a duna Staring un chens pa replica. Basa riba esaki a ordena e portal pa rectifica cu un texto specifico, y pa cual e portal a haya tres dia pa haci tal. Lesa e sentencia AKI.