Ruiz: Na altura cu cierto negoshi ta cobrando BBO na 6.38%

ORANJESTAD – E cobranza ‘excesivo di impuesto di BBO’ na varios establecimento, tin atencion di gobierno di Aruba. Asina minister di Finanza, Xiomara Ruiz Maduro a sigura NoticiaCla diahuebs mainta. NoticiaCla a tuma nota di varios keho cu tin di ciudadanonan cu a haya nan cu cobranza di BBO na 6.38% envez di e 6% cu ta stipula pa ley desde 1 di juli ultimo. “E tin atencion di departamento di impuesto” Ruiz Maduro a sigura e mandatario. Kico lo haci contra e negoshinan cu ta haci e cobranza ‘robez’ si, no tabata mucho cla.

CLARIDAD

Loke si e mandatario a bisa ta cu posiblemente mester adapta e ley pa asina “crea mas claridad y evita cu por tin maluso di e cobranza di BBO’. A compronde cu e cobranza robez ta pasando den algun establecimento grandi, unda cu ta cobrando e cliente 6.38% envez di 6%. “Ta 6% ta wordo cobra pa ley riba locual e negoshi ta haya nan entrada” Ruiz a bisa. “ Pero tin comerciante ta cobra e 6% aki na e consumidor y esaki ta haci cu nan ta cobra 6,38% enves di 6%” e mandatario a sigui bisa. E manera di cobra BBO aki no ta di awor segun Ruiz, pero debi na e cambio di ley tur hende ta extra alerto cual ta algo bon. “Y pesey nos a pidi Departamento di Impuesto pa atende cu e discrepancia aki” Ruiz a finalisa bisando, pa evita cu por tin maluso di e cobranza di BBO.