Oduber: Lo no castiga CEO di ATA pa e caso ‘Team Aruba’

ORANJESTAD – Mientras cu berdad e CEO di Aruba Tourism Authority Ronella Tjin-Asjoe por a atende e caso di sponsorship pa Team Aruba diferente, e no tin peliger pa perde su trabou den e caso aki. Asina minister di turismo Dangui Oduber a bisa NoticiaCla. “Mi no kier bisa cu e ta fout, pero mi ta kere (cu) e por a maneh’e di un manera distinto pa evita cu esaki lo a bira un discusion asina “ Oduber a bisa, refiriendo na e hecho cu e presidente di hunta di directiva Marieta Ras a aproba algo asambiendas cu minister no ta di acuerdo cu e contract aki.

CONTENTO CU E CEO?

A puntra e minister den un forma mas directo, si e ta contento cu e forma con e CEO ta maneha ATA, y e mandatario a bisa cu e no tin problema cu ne. “Ningun momento mi ta kere cu esaki mester ta un motibo pa pone su trabou na peliger” Oduber a sigura e portal aki. “Esaki no ta e caso. Nos a traha na un manera profesional cu otro e ultimo lunanan aki. Nos a traha bon cu otro y nos tin un bon relacion cu otro. Kier men mi no ta kere cu un decision asina mester ta un motibo pa pone un banda den e caso aki” e mandatario a sigui bisa.