Minister: Huez no a bisa cu Staring mester bolbe den calidad di director

ORANJESTAD – Ningun momento sentencia di huez den caso di director di Salud Jerry Staring, ta bisa explicitamente cu mester laga e bolbe trabou den funcion di director. Asina minister di Salud Dangui Oduber a reacciona riba e sentencia dicta siman pasa diabierna. Na e occasion aki, huez a dicta cu e ‘toegangontzegging’ pa e director mester keda revoca, y cu e director por reanuda su trabou. Ora cu e director a bolbe, e la haya contratiempo cu su trahadonan. E ora e la tuma un ATV dag pa delibera cu su abogado y a entama un caso contra e minister diamars ultimo.

PROLONGA PERIODO

Notable ta cu Oduber a prolonga e periodo cu Staring no por funciona como director, di 6 siman pa 12 siman, den un carta cu e la manda pa e director siman pasa diabierna. Segun Oduber na e portal aki, motibo ta pasobra mientrastanto a surgi e situacion conoci cu ta nifica cu mester di mas tempo pa haci un investigacion den e caso aki. Loke cu Oduber ta lamenta, ta cu Staring awor ta hunga victima, siendo cu no tin ningun necesidad pa tal. Segun e mandatario, Staring ta cobrando su salario normal, y a keda cu tur su beneficionan. “Simplemente a splik’e e situacion kico e situacion ta y kico e keho ta, y nos a dune e espacio pa duna su banda di medaya, y a pidi’e cooperacion pa duna nos espacio pa 6 siman pa e keda cas” Oduber a sigui bisa. Segun e mandatario, Staring a dune un man y a bise cu no ta problema y cu e ta coopera cu e investigacion. Sinembargo 24 ora despues Oduber a ricibi un carta di abogado, cu un demanda. Gobierno a mande un carta ‘confidencial pe’ mesun dia na su persona pero ‘ni un rato despues’ cierto medionan di comunicacion local a publica e carta aki. “E base di confianza entre mi persona cu su persona simplemente a bay”, Oduber a continua bisando. Esaki pasobra a traha tur e tempo cu Staring den un bon forma, aunke cu e la wordo nombra politicamente pa ex minister Alex Schwengle.