Gobierno a para prolongacion di sponsorship pa 'Team Aruba'

ORANJESTAD – E peticion pa Aruba Tourism Authority (ATA) prolonga promocion contract di e grupo ‘Team Aruba’ den forma di cumpra un auto di careda nobo a keda rechaza pa minister Dangui Oduber. Ta trata di e grupo lidera pa subrino di ex premier Mike Eman esta Trevor Eman pa promove nos isla na Merca. E mandatario a confirma esaki diaranson pa NoticiaCla. E contract cu sponsorship di ATA na balor di casi 900.000 mil florin tabata pidi pues pa.

E DEAL

E peticion tabata pa e grupo Team Aruba den 2018 cera un contracto di 3 aña cu ATA. E motibo primordial di e contract, pa inverti den un auto di careda nobo, y laga ATA cumpra e nobo aki. “Pami ta inaceptable pa den e situacion cu nos ta aden di crisis, haci un request pa haya casi 900.000 florin” Oduber a bisa. E ta lamenta cu e presidente di e board di ATA, Marieta Ras, a bay di acuerdo cu esaki. Segun Oduber, Ras a actua contra tur regla di corporate good governance, pasobra den e statuut di ATA Sui Generis, cu na momento cu bo ta un consehero di un minister di turismo, bo no por fungi como un miembro di directiva di ATA.

POSICION DI RAS

A puntra Oduber e ora si e statuut no ta permiti esaki, pakico Ras ta fungiendo ainda como presidente di e board. Segun Oduber, ta pasobra e sistema burocratico tin e proceso tranca cu no por a pasa e landsbesluiten pa nombra e miembronan nobo di directiva di ATA. Ta wardando gobernador di Aruba firma e landsbesluit pa asina gobierno tin su tres miembronan den e directiva. “Nos ta lamenta esaki, pasobra sra Ras tabata na altura cu gobierno no ta di acuerdo cu prolongacion y extencion di e contract specifico aki. “E no ta bay zo zeer pasobra ta Mike Eman of su ruman of subrino” Oduber a sigura e portal aki. E ta bay mas pasobra e mandatario no ta wak e esencia y ‘return on investment’ den e proyecto. No ta na altura con esaki lo beneficia Aruba den p.e. haya mas turista, mas cobertura etc.