Minister ta desmenti cu tin problema cu Royal Schiphol Group

ORANJESTAD – Mientras cu e ta desmenti cu gobierno di Aruba tin problema cu e compania cu ta maneha aeropuerto, esta Royal Schiphol Group, e mandatario responsabel pa aeropuerto esta Dangui Oduber, a confirma si na NoticiaCla.com diaranson cu a pidi e presidente di hunta di directiva di AAA esta Rafael Croes pa entrega su retiro pa su declaracionnan inapropia haci recientemente. No por a bay den detayes di e declaracionnan si. E Oduber ta sigura no cu tin problema cu Schiphol Group, te cu nan lo a menaza di bandona aeropuerto. “Mi tin cu desmenti esaki (refiriendo na e noticia cu Schiphol group tin problema” Oduber a bisa NoticiaCla diaranson.

REUNION

E mandatario a confirma cu a reuni cu representante di Royal Schiphol Group na Aruba, esta e director actual di Triple A NV, James Fazio ora cu tabatin cambio di gobierno. De hecho a bisa cu tin reunion regular cu e director. Royal Schiphol Group for di 2004 tin un contracto pa maneha e aeropuerto. E prome CEO cu a haci esaki pa nan tabata e Hulandes Peter Steinmetz cu tabata na timon pa 10 aña y 4 luna. Jamez Fazio a tuma over na September di 2014. “Mi no a ricibi ningun corespondencia oficial di Schiphol. Mi no a ricibi ningun e-mail tampoco di nan, expresando nan malcontento” Oduber a sigui bisa. “Si esaki ta e caso, mi ta kere cu lo ta mas cu husto pa nan manda mi corespondencia, cual no a tuma lugar” e mandatario a sigui bisa. “Tur cos ta on schedule” Oduber a bisa refiriendo na e proyecto Gateway 2030 cu ta un proyecto di 300 miyon dollar pa loke ta renobacion y ampliacion di aeropuerto.