Stichting Parkietenbos: Candela na dump no por ripiti

ORANJESTAD - Despues di e candela feroz di diabierna ultimo Stichting Parkietenbos a haya un cantidad di reaccion di habitantenan di e bario cu a puntra ta kico a pasa, nos ta bay padilanti of nos ta bayendo atras? Asina e fundacion a informa pa medio di un comunicado diamars. Un enorme candela a tapa parti di e cielo di Aruba, e costa parti pazuid pasando riba Renaissance Island te yega riba e lama dilanti Surfside y e pista di Aeropuerto. Algo increibel y un bista sumamente mahos.

INVESTIGACION

E fundacion cu ta sali na defensa di e habitantenan di bario a compronde cu tin un investigacion andando pa sa con algo asina por a pasa. Pero mester bisa cu no ta promer biaha cu esaki ta pasa y e fundacion ta haya cu mester bin mas seriedad den seguridad na e dump.

INSTALA CAMARA

Segun e fundacion, mester instala camaranan di seguridad pa asina proteha e sitio di casonan asina cu a hera expande mas y causa un tragedia mas grandi. Algun siman pasa ya durante oranan di merdia cu biento a cay tabata tin kimamento. E fundacion a compronde cu sushi di cas ya no ta bayendo e dump mas pero ta parce cu awor ta tire y otro sushedad a bira e problema.

SOLUCION GOBIERNO

E fundacion ta spera cu gobierno di Aruba y Ministro Otmar Oduber sigui traha riba e solucion total pa maneho di desperdicio pa Aruba y cu pronto esaki por keda cla. Turistanan den Aeropuerto tambe tabata mira e imagenan aki, tin cu hasta a kere cu ta avion a cay na Aruba lugar ta e sero di Dump di Aruba ta na candela. “Nos ta spera cu definitivamente e incidente tristo aki no ripiti den futuro mas” e fundacion ta finalisa bisando.