Long Table event di Renaissance a genera $ 25.000,= pa Casa Cuna

Posted on 07/10/2018 3:33 pm AST | Updated on 07/10/2018 3:34 pm AST

ORANJESTAD – E di dos edicion di e Long Table event di Renaissance a genera $ 25.000,= pa Casa Cuna e aña aki. Renaissance Aruba Resort & Casino a presenta su di dos edicion di ‘Long Table’. Aña pasa e evento a surpasa tur expectativa den ‘dinner experience’ y e aña aki no tabata un excepcion, considerando cu e evento culinario tabata ‘sold out’ mas cu un luna prome cu e fecha. Pa un solo anochi Renaissance Aruba a sirbi dinner, na e mesa di mas largo na Aruba. E mesa cu a cubri parti di L.G Smith Boulevard a acomoda 1,000 persona. E aña aki tabata tin un solo beneficiario; tur fondo recauda a bay pa Stichting Casa Cuna Progreso.

$25.000 PA STICHTING CASA CUNA PROGRESO

Interesadonan por a contribui na e bon causa cumprando un carchi pa $25. Tur hende por a disfruta di 3 entrada acompaña pa dos glas di biña perfectamente selecciona. E team culinario di Renaissance Aruba a bolbe haci un tremendo trabou! Na final di e anochi a haci entrega di $25.000 na Stichting Casa Cuna Progreso. Gerente General di Renaissance Aruba Resort & Casino, sr. Paul Gielen a comenta di ta sumamente orguyoso di por haci esaki pa comunidad di Aruba. “E evento aki ta cuadra perfectamente cu nos filosofia di empresa, awor aki parti di Wind Creek Hospitality. Duna bek na nos comunidad y aporta na un desaroyo positivo di nos mes hendenan. Mi ta gradici tur colega cu a traha duro pa un biaha mas nos realisa otro edicion exitoso di Long Table. Danki na tur esunnan cu a cumpra nan carchi cu hopi entusiasmo pa yuda nos recauda fondo pa e causa di e aña aki. Nos ta spera di por conta cu boso otro aña atrobe!”

 

 

  • Powered by SETAR