Staring ta hiba minister corte atrobe pa incumplimento di sentencia

ORANJESTAD – Director di dept. di Salud Jerry Staring lo hiba gobierno corte un biaha mas, debi cu gobierno no ta respetando e sentencia ultimo di dia 6 di juli na fabor di e director. E sentencia ey ta dicta cu gobierno mester revoca e prohibicion di entrada na e director y permitie pa haci su trabou. Pero den un carta (cu ta den poder di NoticiaCla) cu e minister encarga esta Dangui Oduber a manda riba mesun dia di e sentencia, Staring por bolbe, pero den un otro funcion. Algo cu segun Staring, no ta conforme e sentencia. Abogado di Staring, David Kock a confirma cu pesey a dicidi di bay corte un biaha mas y a entama e siguiente caso diamars atardi mes. 

CARTA MINISTER

Den e carta menciona, e mandatario ta reconoce e sentencia den su contra, y ta bin cu un contra medida indicando cu Staring por bolbe e departamento pero no como director sino coordinador. E funcion aki (di cual e tareanan nobo di Staring lo wordo informa di dje pronto segun e mandatario) Staring tin cu eherce pa un periodo di 12 siman, y haci esaki den un oficina diferente ya cu e oficina di director, ta wordo usa actualmente pa e management team instala na juni. Motibo di e decision segun Oduber, ta cu e investigacion tumando lugar riba e.o. prestacion di Staring, no a completa ainda. Mirando cu esaki segun Staring, no ta loke e sentencia ta indica, e ta bay corte pa tene gobierno (lesa: minister Dangui Oduber) na e sentencia dicta dia 6 di juli.