Exprodesk a habri Business Week 2018 ‘Conquering New Horizons’

ORANJESTAD - Exprodesk a habri Business Week 2018 ‘Conquering New Horizons’. E Business Week 2018 a habri e prome dia cu e tayer ‘International (ISO) Standards: Increase your competitive advantage’. Sra. Thaira Vargas di Metrosystem N.V. a elabora riba e aspectonan cu mester tene cuenta cu ne prome cu bo por cuminsa exporta bo producto of servicio. Sra. Vargas a splica e diferencia entre e rekisitonan obligatorio y e reglanan voluntario; nan desafionan, bentahanan y oportunidadnan. Sra. Vargas a splica tambe riba seguridad sanitario y calidad di productonan, calidad nutritivo, impacto riba medio-ambiente, impacto social y comercio husto, normanan tocante etiketa y empake. Sra. Vargas a sigui elabora riba diferente stantardnan internacional cu e sectornan di servicio mester tene cuenta cu ne.

Den un sala completamente yen, Sra Bionda Fonseca-Hoeve a presenta riba e segundo dia, e ‘Masterclass e-Commerce: Growing beyond borders’. Sra. Fonseca-Hoeve ademas di elabora over transaccionnan comercial digital, a presenta casonan concreto (case studies) y ehempelnan practico unda participantenan a haya hermentnan valioso cu por ser implementa den nan negoshinan. Sra. Fonseca-Hoeve a uza casonan concreto pa mustra oportunidadnan inovativo y regional. Tambe a haci uzo di diferente video pa ilustra venta online.

Den coneccion cu e proyecto grandi di Expodesk tocante e Industria di servico, sra, Taiana Mora Ramis di NEX Consulting tambe a ser invita pa participa den e Business Week 2018. Sra. Mora Ramis a conduci un estudio tocante e sectornan di servicio na Aruba. A base di e estudio aki, a scoge e tres sectornan di servicio mas prominente cu a resulta di ta:servicionan profesional, industria creativo y ICT. Door di esaki e tayer intensivo di diaranson (juli 11) lo ta pa duna nos negoshinan chikito y mediano e oportunidad pa duna nan input y alabes scoge e top sector di servicio. E empresarionan di e top sector scogi lo haya one-on-one sessions pa forma un strategia specifico pa esnan cu tin e potencial pa exporta. Nan lo ricibi e guia y informacion vital pa haci nan mes ‘export ready’.

E Business Week 2018 ‘Conquering New Horizons’ ta completamente gratis y a tumando lugar na Departamento di Asuntonan Economico, cu ta situa na L.G Smith Boulevard #160, na edificio di Sun Plaza, riba segundo piso.

Exprodesk ta promove exportacion pa asina contribui na un desaroyo economico sostenibel atrabes di e capacitacion di nos empresarionan cu interes pa exporta door di duna informacion, guia, consulta, training y facilita diferente tayernan cu topiconan actual.