AZV ta manda 1000 asegurado pa exterior pa aña pa tratamento

ORANJESTAD - Anualmente alrededor di 1000 asegurado di AZV ta wordo manda pa exterior pa tratamentonan medico necesario cual na Aruba no por tuma luga. E tratamentonan pa cual ta manda asegurado den exterior ta mayoria riba e tereno di cardiologia, oncologia, cirugia compleho, oftalmologia, neurocirugia y cuido neonatal (babynan prematuro). E gran parti di nos aseguradonan ta wordo manda pa Colombia, un parti mas chikito pa Corsow y Hulanda.

Awe AZV ta ricibi e noticia, pa medio di e publicacion “Ranking de Hospitales y Clinícas 2014” di “America Economia”, cu di e cuater hospitalnan cu AZV ta traha cu nan, tres ta cay bou di e Top 10 di Latino America. E gran mayoria di asegurado di AZV cu ta wordo manda pa Colombia, ta bay netamente na e dos hospital cu a score den Top 5, esta Fundacion Valle del Lili (Cali, Colombia) y Fundacion Cardiovascular de Colombia (Bucaramanga, Colombia). AZV ta contento cu e colaboracion cu e hospitalnan. Desde un principio AZV tabata tin e confianza cu e hospitalnan Colombiano lo duna cuido di calidad halto y cu e gastonan di cuido medico den exterior (pa cada caso apart) lo baha. Pa AZV e ta un satisfaccion pa wak cu e investigacion ta comproba e calidad halto di e hospitalnan.

E publicacion ta splica cu mas y mas hospital den Latino America ta busca nan reconocemento y acreditacion internacional, pa asina mustra mundo completo unda nan ta para riba e lista. E hospitalnan participante na e investigacion ta wordo controla y monitoria constantemente door di organisacionnan internacional, pa asina por cumpli cu tur e exigencianan di calidad y ricibi e accreditacion di “JCI” (Joint Commission International). Den aña 2009 tabata tin solamente 6 hospital cu e accreditacion “JCI”. Awor esaki a yega na un total di 14. Asina mes, tin mas hospital cu kier yega na e accreditacion “JCI” pero como hospital bo mester cumpli cu exigencianan halto pa por yega na esaki. Igual cu den pasado, e investigacion ta wordo haci bou di 5000 hospital den Latino America y ta basa riba diferente punto/dimension. E seis dimension mas importante ta: Siguridad y dignidad pa pashent. Akinan ta wak e indicadonan di procesonan y resultadonan cu ta permiti minimalisa riesgo pa pashent den hospital.

Capital humano di e hospital. Ta haci un analisis di e cantidad di specialista medico, cantidad di enfermero y e maneho general di e hospital. Capacidad di e hospital. Ta midi e cantidad di ingreso, cama, specialidad y sub specialidad, examen di laboratorio, cirugia y mas. Conocemento. Ta wak e indicadonan cu ta midi e capacidad pa genera, obtene y difundi conocemento medico.

Ta midi y considera e variabel nan den eficiencia medico, p.e. frecuencia cu cama of sala di operacion ta wordo ocupa, eficiencia financiero, kiermen si tin balansa financiero y tambe cua resultado financiero tin. Prestigio. Ta midi y considera, pa medio di encuesta haci bou di e docternan di e hospitalnan participante, como tambe pa medio di encuesta bou di e pashentnan, e logronan y alianzanan strategico entre e hospitalnan.

For di e investigacion 2014 a sali na cla cu e miho hospital di Latino America ta Hospital Israelita Albert Einstein di São Paulo, Brazil. E hospital aki a keda cu su posicion number uno manera anteriormente. Den e top 10 a keda;

10 Fundación Cardioinfantil na Bogotá, Colombia.

9 Clínica Internacional na Lima, Peru.

8 Hospital Clínica Bíblica na San José, Costa Rica.

7 Hospital Pablo Tobón Uribe na Medillín, Colombia.

6 Hospital Samaritano de São Paulo na Sáo Paulo, Brasil.

5 Fundación Valle del Lili na Cali, Colombia.

4 Fundación Cardiovascular de Colombia na Bucaramanga, Colombia.

3 Hospital Universitario Austral na Buenos Aires, Argentina.

2 Clínica Alemana na Santiago, Chile.

1 Hospital Israelita Albert Einstein di São Paulo na Sáo Paulo, Brasil.

Pa e personanan interesa pa lesa tocante e cuater hospitalnan cu AZV ta traha cu nan por wak riba nan website:

Fundación Valle del Lili na Cali

Hospital Pablo Tobón Uribe na Medellín

Fundación Cardiovascular de Colombia na Bucaramanga

Clinica General del Norte na Baranquilla www.clinicageneraldelnorte.com

Of por bay tambe riba www.americaeconomia.com pa lesa mas tocante e “Ránking de Hospitales y Clínicas 2014”.