Posibel investigacion riba kico a bay fout cu investigacion den caso Zinnia Croes

ORANJESTAD – Tin posibilidad cu e 'scope' di e investigacion bira mas amplio den e caso di morto di Zinnia Croes cu solamente aumenta castigo disciplinario pa e polis responsabel pa morto di e hobencita na 2015. E polis a haya 240 ora di trabou comunitario y 2 aña prohibicion di rijbewijs. Fayo cometi pa polisnan encarga cu e investigacion a conduci cu no por a duna un castigo mas halto den e caso. Y basa riba esaki ta bay wak si e castigonan no ta keda na solamente e polis envolvi. A puntra si esey kier men polisnan envolvi cu e investigacion tambe por haya castigo disciplinario pa e mal trabou haci, e mandatario a bisa cu esey ta e scope di e investigacion mas amplio. E no a bisa si cu esey automaticamente kier men cu esey lo ta e caso. Minister di husticia Andin Bikker a splica NoticiaCla dialuna durante un conferencia di prensa, cu e siman aki lo sinta cu hefe di polis Hoo riba e caso y pa wak si internamente kico mester tuma lugar a base di informacion cu e mandatario a ricibi riba e caso. Y esey por envolvi e loke a keda menciona anteriormente. Ta trata di informacion cu ta indica cu cosnan a base di e informacion ricibi, cu ta indica cu aparentemente tin cosnan cu por a bay miho den investigacion cu no a bay manera mester a bay.

COMENTARIO

Parti di e decision di e mandatario, ta basa riba comentario cu e mandatario a haya den comunidad, criticando cu e.o. e polis cu tabata responsabel pa morto di e hobencita, a haya un castigo mucho abou. Ademas e informacion ricibi cu a stroba e investigacion, cu a pone cu e resultado di e caso y sentencia consecuentemente a sali diferente. Entre otro por papia di falta di material na e momento di e caso cu tabata necesario, cu e.o. no por a presenta prueba crucial, siendo cu a resulta cu e material tabata disponibel masha bon. Esey ta e dimension den cual e siguiente combersacion lo bay cu e hefe maximo di polis.