Bermudez: ‘VUT-regeling’ pa controla gastonan di personal

ORANJESTAD – Minister di finanza Angel Bermudez kier interoduci e asina yama ‘Vut’ Regeling como medida pa controla gastonan di personal.Recientemente Bermudez a splica varios punto esencial cu ta forma parti di e presupuesto supletorio cu a wordo entrega ultimo, aki tambe ta papia di un areglo pa salida boluntario cu pronto lo ta disponibel pa reduci e gastonan di personal di Gobierno.

E punto di Bermudez ta cu e ‘rentelast norm’ mester baha dentro di e 10 añanan venidero te cu mas of menos 5% di e presupuesto. Pues cu esaki lo logra un domino riba e gastonan y na mes momento crea un espacio y mas forma pa un maneho nobo.

Segun Bermudez, sigur e dominio y reduccion di gastonan di personal ta un punto hopi importante cu a wordo inclui den e presupuesto. “ E aspecto mas elabora ta e introduccion di un areglo pa salida boluntario, esta un ‘VUT-regeling’ pa esunnan cu kier haci uzo di dje por ehempel door di tuma un areglo pa un tempo cortico y despues baha cu pensioen prome cu e edad di pensioen mes sigui subi manera a wordo proponi. “

E mandatario ta sigui papia di un ‘formele wachtgeld regeling’ y tambe un ‘deeltijd regeling’ caminda cu esunnan cu kier traha ‘part time’ por haci esaki. Tur e 3 areglonan aki den e añanan venidero pero principalmente cuminsando desde 2015 caba lo contribui na un reduccion di e gastonan di personal. Mester resalta cu esunnan cu bay cu pensioen, tuma nan retiro of pa un of otro motibo sali for di servicio di Gobierno, lo no wordo reemplasa, pues di e forma aki gradualmente lo reduci e volumen di personal di Gobierno.

Finalmente e mandatario a agrega cu e areglo di pensioen di ambtenaar, cu ta un acuerdo basa riba un protocol entre APFA y e sindicatonan tambe ta un otro ehempel di con lo reduci e gastonan di personal. “E concepto di ley ta canando y den November nos ta spera cu e ta wordo formalisa den Staten. E dotacion na APFA mes tin otro cambionan den dje pa cual e gastonan di parti di Gobierno pa loke ta trata e pensioen di su personal den e añanan venidero lo baha drasticamente”, Bermudez a indica.