Minister ta lamenta candela un biaha mas na Dump Parkietenbos

ORANJESTAD – “Ta lamentable locual a tuma lugar un biaha mas”. Esey tabata e prome reaccion di minister di medio ambiente Otmar Oduber na NoticiaCla riba e candela repentino di diabierna atardi. “ Saneamento di ParketenBos ta un prioridad cu mester worde atendi cune a corto plazo” e mandatario a sigui bisa. El a gradici e trahadornan di dump, brandweer, Johnson y otronan cu a yega di biaha pa duna un man. “Pronto recuperacion tambe na e operador di e heavy equipment cu a accidenta durante e trabaonan” e mandatario a sigui bisa.

E CANDELA

Tabata diabierna merdia cu testigonan a nota un candela grandi riba dump na Parkietenbos cu a hala hopi atencion. Esaki debi na e cantidad pisa di huma cu tabata sali di e lugar, y e area cu e tabata cubri. Na e sitio por a tuma nota cu bomberonan tabata purba combati e huma, y cu tabata di un area specifico e tabata bin. Mientras cu no ta conoci kico a causa e candela, tin speculacion cu ta trata di un candela intencional cendi. Di parti di Serlimar ta investigando ken y con e candela aki por a wordo cendi.