Trahadornan DVG a protesta contra director Jerry Staring

ORANJESTAD – Trahadornan di departamento di salud (DVG) a protesta dialuna mainta, specificamente contra e director Jerry Staring. E sentencia di huez diabierna cu Staring a gana y asina permitie entrada bek na e departamento no a cay den bon tera cerca e trahadornan. E vocero di e grupo , hurista Gilbert Dijkhoff, a presenta un manifiesto unda cu ta pidi e director pa e keda cas, no obstante e sentencia di huez na su fabor, te ora cu e investigacion andando, termina. A duna e director te diahuebs mainta 10’or pa e reacciona, sino por spera accion mas fuerte. Ta e kehonan di e trahadornan a conduci na e investigacion y despues ponemento di e director riba ‘non-actief’.

PROBLEMA

Segun Dijkhoff, siguiendo regla di Hulanda, unda cu Staring a nace y cria, ora cu un persona den un funcion halto tin problema di maneho, e ta tuma su retiro. A mustra cu contrario na e pensamento di e huez y e veredicto na fabor di Staring, cu e director no ta funciona bon, no sa haci su trabou y asina ta stroba e trahadornan di traha.

E SENTENCIA

Tabata diabierna cu Staring a gana su caso contra minister di Salud Dangui Oduber, revocando e status di ‘non actief’ di e director. A mande riba ‘non-actief’ pa por a haci investigacion den e departamento, pa un periodo di 6 siman. Durante e caso a resulta segun gobierno, cu ningun momento por papia di un suspension, sino djis ‘pone riba non-actief’ pa e no stroba e investigacion. E sentencia di diabierna sinembargo a nifica cu entrante awe dialuna e director por a bolbe trabou. Algo cu e trahadornan aparentemente no ta di acuerdo cune. Potret cortesia 24ora.com