Candela na dump di Parkietenbos diabierna a hala atencion

BARCADERA – Diabierna merdia un candela grandi riba dump na Parkietenbos a hala hopi atencion. Esaki debi na e cantidad pisa di huma cu tabata sali di e lugar, y e area cu e tabata cubri. Na e sitio por a tuma nota cu bomberonan tabata purba combati e huma, y cu tabata di un area specifico e tabata bin. Informacion no confirma ta bisa cu tabata un candela intencional, di hendenan cu a subi y sende esaki. Pero esaki no por a keda confirma. E portal aki a tuma contacto cu e mandatario responsabel pa medio ambiente Otmar Oduber, pero ainda no a logra un reaccion.

CANDELA

Tabata e siman aki ainda cu e mandatario a bisa cu awor e candela ta bay paga, y cu no ta bay deposita sushi mas di cas na e dump. Entre otro esaki lo conduci cu no tin candela mas riba dump. Y e siman aki tabatin e situacion rond di e trahadornan di Serlimar cu tabata den un incertidumbre segun nan sindicato SEPPA, y cu a conduci cu nan tur a bay den accion na Dump como protesta, y a cera dump e mainta ey. Despues di un dia tabatin programa e reunion parlamentario riba Serlimar, cu despues a keda cancela. No ta conoci pues si e candela di awe tabata un ‘stunt’ pa hala atencion y proba un punto, pero e hecho ta cu henter atardi, e candela a domina e shelo cu ta cerca di aeropuerto y cu por tabatin efecto riba trafico aereo y e medio ambiente directo di e parti sur di Aruba.