Minister kier mas castigo disciplinario pa polis responsabel pa morto di Zinnia Croes

ORANJESTAD – Minister di husticia Andin Bikker a confirma na NoticiaCla diabierna cu e la pidi pa tuma (mas) paso disciplinario contra e polis Vriend, a base di e sentencia di diahuebs den caso di morto di e hobencita Zinnia Croes. Den e caso aki, huez a sentencia e polis aki na 240 ora di trabou comunitario y a kita su rijbewijs pa 2 aña largo. Comunidad no a aprecia y acepta e sentencia y tabata basta vocal publicamente, indicando cu ta considera e loke a sosode, un inhusticia y cu e polis merece castigo di prison. Bek pa e mandatario, banda di a pidi DHR (Direccion di Recurso Humano) pa tuma mas edida disciplinario (a haci esey despues di papia cu hefe di polis Hoo, a bisa cu e lo reuni otro siman cu e mayornan di Zinnia Croes, hunto cu parlamentario Sue Ann Ras di partido MEP. E ultimo aki a acerca e mandatario den pasado caba riba e ultimo casonan unda cu sentencia nan a cay den caso di asesinato envolviendo hoben.

E CASO

Manera ta conoci, ayera huez a dicta cu e polis Jadira Vriend ta culpabel pa morto di e hobencita Zinnia Croes na maart 2015. Pero debi cu tabatin fayo den e investigacion policial, e no por duna un sentencia otro cu fiscal a pidi, cu ta 240 ora di trabou comunitario y kita su rijbewijs pa un periodo di dos aña. Mayornan di e hobencita ta satisfecho cu e sentencia, den sentido cu huez a haya e polis culpabel y no Zinnia. Nan tabata prepara pa e sentencia aki, y por biba cu ne.

PRUEBA

Huez diahuebs a repasa e hechonan presenta den corte durante e tratamento di e caso, y a mustra cu pa motibo di e falta di prueba haci pa polis riba e.o. e asunto di test di alcohol, no por usa e prueba presenta cu ta proba cu e polis tabata bou di influencia di alcohol na momento di e accidente. Berdad cu e polis a supla 310 UGL cu ta mas cu e 220 maximo permiti. Pero ora cu e persona acusa, pidi un contra prueba, e mester por haye. Den e caso aki, e polis a pidi un contra prueba, pero cu polis no por a haci pasobra ‘no tabatin material pa haci e prueba’. Cu a resulta despues cu si tabatin e material otro caminda, no ta relevante awor pasobra e no a keda haci toch. Y sin un contra prueba, e prome prueba no ta admisibel den corte. Pesey a duna e polis vrijspraak riba e acusacion cu e tabata bou di influencia di alcohol. Otro parti cu a declara e polis liber, ta riba e parti subsidiar unda cu ta bisa cu e la bebe asina hopi alcohol cu e tabata apto pa core auto. Aki ta pa motibo cu no a traha otro procesverbal riba e parti aki y no tin ningun otro procesverbal pa substancia e punto aki, a declara e polis liber. “Polis por a haci un otro test, pone e persona cana den un liña straight etc, pero polis no a haci esey”, e huez a bisa awe mainta.

CULPABEL

Unda cu huez si a haya e polis culpabel, ta cu e polis a core ‘aanmerkelijk onvoorzichtig’. Aki si huez ta haya proba cu esey a sosode cu consecuencia cu e polis a dal Zinnia mata. Huez a mustra cu e polis mester tabata mas alert ora cu tin mucha den vecindario. “ Bo mester rem, bo no sa nunca kico nan (muchanan riba caya) por haci. E señora tabata core 70/ 80 km y no a brake ora cu e la mira e muchanan. Si bo kita pia di pedal, y no brake, e velocidad no ta baha di biaha” e huez a sigui bisa. E auto ademas tabatin tinted glass cu ora cu bira scur, bo no ta mira bon pafo. “Sabiendo esey, e señora no a brake toch. E auto a sigui core 70/80. Testigo a bisa cu e mucha a wak links rechts, pero e auto tabata core duro. E ponencia di e señora cu e mucha a core dilanti e persona, no ta klop” huez a sigui bisa. “ Si bo a let op, bo por a wak e actuacion di e mucha. Señora no a ni wak e cruza, pues e señora no tabata pone atencion, of ta pa motibo di e tinted glass” e huez a sigui bisa. Pa esey, huez ta haya proba cu ta e polis a causa e accidente cu resultado fatal.

CASTIGO

Pa por a determina e castigo, huez a mustra riba e seriedad di e caso, e daño irreparable na e famianan. Ademas huez a haya cu . como polis e mester tabata na altura con pa core. Pero e huez a mustra cu e mester tene cuenta cu no por proba cu e señora tabata bou di influencia. Esey ta nifica cu e castigo mester baha. A tene cuenta tambe cu e tempo cu a pasa (3 aña) y cu esey ta influencia e castigo su haltura tambe. Consecuentemente huez no ta haya e castigo pidi, irrazonable y a bay di acuerdo cu e demanda, esta un castigo di 240 ora di trabou comunitario, un leerstraf di 24 ora y ta kita rijbewijs pa 2 aña. Si e polis no cumpli cu e sentencia, e tin cu sinta 120 dia den prison.