- Kes the Band di Trinidad confirma pa Flip Flop Festival na juni!
- DVG: A cuminsa hospitalisa hende localmente infecta cu Dengue
- Minister na Merca ta lobby cu banconan pa fia 160 miyon dollar
- Hulanda dispuesto pa yuda paisnan den Caribe cu asunto di refugiadonan
- WEB Aruba ta firma acuerdo cu Seven Seas Water Group pa construi planta SWRO-3
Padrastro den caso Speeltuin sentencia na 15 aña di prizon y TBS
ORANJESTAD – Corte a sentencia e padrastro di e dos criaturanan Rishandroh Anastacia y Eugene Frans na 15 aña di castigo incondicional di prizon combina cu TBS (Ter Beschikking Stelling) obligatorio despues cu e detenido sinta 10 aña di su castigo di prizon. Remarcable ta e hecho cu e padrastro a opta pa no ta presente den corte pa tende su sentencia y a informa corte un anochi prome. Y e famia tampoco tabata presente pa esaki. Tur esey, siendo cu net awe corte a haci tur preparacion pa por a ‘transmiti’ e sentencia den un otro sala si en caso tabatin e necesidad.
E CASO
E padrastro tabata acusa di homicidio y severamente maltrata e criaturanan Rishandroh y Eugene. Banda di esey, e tabata acusa di a maltrata e co-sospechoso esta e mama di e dos criaturanan, y e hecho cu e la dera e curpa di Eugene. Ministerio Publico a conclui cu e hechonan presenta a keda proba pa cual a exigi un castigo di prizon di 15 aña y e medida di TBS (tratamento psychiatrico obligatorio) . Banda di esey, OM a pidi pa ehecuta un sentencia bieu di castigo di prison condicional.
COOPERACION
Huez a mustra cu e sospechoso a coopera cu e proceso penal y a haci declaracionnan di culpabilidad. Tambe e la mustra polis unda cu e la dera e curpa di Eugene. Su declaracionnan a keda confirma pa e co-sospechoso, testigo y raportahe di autopsia, cu ta splica e embergadura y tamaño di e lesionnan di e criatura(nan). Tambe huez a confirma cu a base di e pruebanan legal presenta, di e homicidio y e maltrato severo di ambos criatura, e maltrato di e co-sospechoso y e deramento di e curpa di Eugene.
EVALUACION
Huez tambe mester a considera cu den e caso aki mester a busca pa yega na un balansa riba e sufrimento cu e victimanan y famianan di un banda y di otro banda, evita cu un caso asina ta ripiti, pa cual mester provee e seguridad pa e comunidad.
TRATAMENTO DI ACUSADO
E sospechoso segun huez, a wordo trata pa tanto un psikiatra como un psicologo. Ambos a yega na e conclusion cu e sospechoso ta sufri di trastorno di personalidad, cu caracteristico cla psicopatico. Tambe e sospechoso ta sufri di un leve caso di no por wordo teni responsible pa su actonan. Pues debi na su estado mental, e no por wordo teni responsabel pa su actonan. “En caso e no haya e tratamento necesario, chens pa aumento di recidivismo lo aumenta” huez a sigui bisa. Den pasado a keda proba cu e sospechoso no kier tuma tratamento asina lihe. Pa e tratamento tin chens pa logra, esaki mester ta uno di duracion largo. Pesey a impone un castigo combina cu TBS. Y pesey, mirando tur lo anterior, huez a bisa di no por solamente impone un castigo di prizon, sino cu tin cu combine cu e tratamento TBS obligatorio. A bisa tambe cu mirando e circunstancia, no a maxima e medida di TBS. E castigo di prizon ta evalua basa riba e circumstancianan presenta den corte, y tur e hechonan confirma y trata. A rechaza e peticion di OM pa ehecuta un sentencia di castigo bieu di prizon di e sospechoso.
TBS A mustra tambe cu aworaki na Aruba no tin un clinica TBS. E ubicacion den un clinica asina di e acusado, ta bin na ordo despues di cu e acusado a sinta 2/3 parti di su castigo di prizon, pues mas tempran cu esaki por sosode, ta despues di 10 aña. Ta haciendo investigacion pa por habri un clinica semehante na Corsou, pa convictonan di Aruba, Bonaire, St Maarten, Saba y Statia. En caso cu e clinica aki no materializa pa e tempo ey, OM tin cu evalua pa transferi e acusado pa un clinica TBS na Hulanda. E derecho penal di Aruba ta permiti esey segun huez. Pa laga e sospechoso bolbe den comunidad sin un tratamento obligatorio, huez ta considera algo inaceptable. A mustra cu sospechoso por apela e sentencia presenta y tin 14 dia pa haci esaki. Lesa e sentencia AKI.
Corte: Caso ‘Isla di Oro’ ta sigui fin di luna awor, cu mesun huez
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
Corte a rechasa peticion di gobierno pa kita (wraak) huez di caso Isla di Oro
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.
OM: Awor Aruba tin hende certifica den Terapia di famia multi dimensional
Abogado Gomez: Leynan pa castiga abuso di bestia, ta deficiente
ORANJESTAD – Leynan y castigonan consecuente pa castiga matralto di animal (mascota) ta hopi deficiente. Asina abogado mr Lincoln “Dello” Gomez a constata e fin di siman aki. Segun e abogado, e ta referi na e caso di e cacho cu a conoce un maltrato cu a conduci na su morto finalmente. Cu esaki pueblo a pidi castigo pa e persona aki. Pero segun e abogado, e ta keda desapunta cu e leynan cu tin den un caso semejante. E abogado ta splica den e video.
Manera anticipa pa Noticiacla: Ex minister Besaril a recobra su libertad
ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes.
Ex minister Besaril por recobra su libertad diabierna
ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan.
Follow NoticiaCla
