Douane: Ta lamenta tragedia riba laman cu a costa bida di 2 Venezolano

ORANJESTAD - Autoridadnan Arubano ta lamenta e tragedia riba lama cu a costa bida di 2 Venezolano. Asina departamento di aduana a informa diahuebs atardi.

Un boto di placer cu tawata involucra den un tragedia riba lama, no a cumpli cu e documentonan oficial cu ta rekeri pa un boto por sali di un forma legal for di Venezuela. Na momento cu e boto aki a yega Aruba e tabata den posesion di un zarpe falso (vertrekdocument di Venezuela). Autoridadnan na Aruba a constata cu e boto en cuestion tabatin documento falsica (valsheid in geschrift) y a pone ministerio publico na altura. Ministerio publico a pone na prome instante cu un multa mester wordo paga, sinembargo mirando cu e capitan no tabatin e medionan financiero a dicidi e ora cu lo manda e boto bek pa su punto di origen y no a permiti’e ‘klaar in’.

REVISTA BOTO

Prome cu e boto a sali for di Aruba Directie Scheepvaart Aruba a revisa si e boto ta apto pa nabega. Den revision a constata cu e boto tabata cumpli cu tur e exigencianan entre otro: suficiente combustible, salbabida, suficiente awa y comestible.

Na su turno Kustwacht a compan?a e boto y su tripulantenan te ora nan a sali for di e awa territorial di Aruba. Esaki ta un proceso cu Kustwacht ta haci na tur ocacion, pa sigura cu e boto a sali for di nos awa territorial den un forma responsabel. Despues cu e boto a pasa e awa territorial di Aruba nos autoridadnan NO ta responsabel mas pa loke por pasa. Segun departamento di aduana, pais Aruba ta lamenta e tragedia aki y ta convivi cu e famianan di e victimanan. Palabranan di profundo condolencia y hopi forsa den e momentonan dicifil aki na e famia di e fayecidonan.