Trabao entre rotonde Wayaca y ex Codemsa tin retraso atrobe

ORANJESTAD – Trabaonan riba e parti di Watty Vos Boulevard entre e rotonde na Wayaca y esun di ex Codemsa, tin un retraso di por lo menos 4 siman. Asina director di Dienst Openbare Werken (DOW) Marlon Croes a confirma na NoticiaCla e siman aki. Esey ta nifica cu no por cumpli cu e promesa haci pa minister di infrastructura Otmar Oduber, cu e lo ta cla den ‘6 luna’, esta luna di augustus. Segun Croes, e ta premira cu mas tarda comienzo of prome siman di September e parti ey mester ta completa.

COMPLICACION

Un di e problemanan cu nan a haya, ta cu e duiker cu mester a wordo traha di nobo, esta uno diferente na esun cu tin mas di 30 aña di existencia, pa e wanta e peso cu tin aworaki. Manera ta conoci algun luna pasa despues di presion di gobierno (lesa: minister Otmar Oduber), a yega na un acuerdo pa e parti di e trabou aki keda cla mas tarda luna di augustus.

AWA

Tabata algun luna prome cu durante e construccion di e rotonde na ex Codemsa, cu a bin ripara problema ora di yobida, y mas pio yobida fuerte. A bin ripara e momento ey cu ora di yobida, practicamente henter e area tabata keda inunda cu awa. A dicidi e ora pa involucra expertonan di Hulanda pa bin cu un plan pa remedia e situacion. Esey so caba a tuma basta tempo, pero parse cu e parti ey a keda resolve. Despues tabatin problema cu e duiker y aki tambe hopi tempo a bay perdi. Trabaonan a simplemente para formal y esaki a crea un problema den trafico.

INTERVENCION

Dado momento minister Oduber a interveni y despues di reuni cu e departamentonan concerni, a informa prensa cu cosnan lo cambia y cu a determina un tempo ‘nobo’ den cual e trabaonan mester a keda cla. Esaki mester a bira principio di luna di augustus. Pero awor ta mustra cu esaki lo tin un otro tardanza, di por lo menos un luna.