Mayornan di Zinnia Croes por biba cu sentencia cu polis a haya

ORANJESTAD – Mayornan di Zinnia Croes Gilbert y Michella por biba cu e sentencia cu huez a dicta diahuebs mainta den corte contra e polis acusa di e causa morto di nan yiu. Den un reaccion pa NoticiaCla, e mama Michella a bisa cu tabata hopi importante pa Zinnia haya su ‘fair chance’ dilanti un huez. “ Loke a dunami un satisfaccion hopi grandi, ta caminda cu huez ta bisa cu e ta haci Jadira Vriend culpabel di e caso aki” e mama Michella Croes-Matos a bisa NoticiaCla. E tabata prepara pa e sentencia di awe, conciente di tur e fayonan cometi pa polis, cu lo a pone cu realisticamente mira, huez no por a castiga Vriend pa e.o e bebemento e dia ey.

CONSENSHI

Segun Croes, Vriend su consenshi sa cu e dia eynan tabata su fout. “Mi ta kere cu esey ta algo cu e tin cu biba cu ne pa resto di su bida”. E ta haya hopi ‘jammer’ cu e polis no tabata presente den corte pa tuma su sentencia. “Mi ta bisa cu Zinnia a bay, y e no ta bin bek. Nos ta hopi conciente di esey. Pero si nos kier a make it hopi clear cu nos yiu muher no tabatin e culpa di e caso aki y esey huez a duna razon. Y esey ta algo cu ami por biba cune” Croes a sigui bisa. Ademas Croes ta kere cu e polisnan cu a traha dia di e accidente, nan sa cu nan a haci un super mal trabou y cu e resto e ta laga den man di Dios.

E TATA

E tata di Zinnia, Gilbert Croes su pensamento riba e caso y sentencia ta varia un poco di su casa. E si ta haya cu huez mester a duna e polis Vriend un castigo di prison. “E mal trabou di KPA a prevalece unda cu door di nan mal investigacion y nan mal trabou, na mi concepto, deliberadamente nan a hacie pa nan colega no haya castigo di prison” Croes a bisa.