Diasabra awor entiero di Ruben Trapenberg ta tuma lugar

ORANJESTAD – Diasabra proximo e entiero di e popular y keri Ruben Trapenberg ta tuma lugar. Remarcable ta cu Ruben mes a practicamente planea su entiero y a laga tur cos cla. Mester bisa cu ta for di aña pasa ora cu e la bira malo na October, organiza manera e ta, e la cuminsa prepara pa e momento aki pues prepara su propio entierro. E entiero mes ta tuma lugar diasabra na Aurora Funeral Home di 5’or di atardi pa 9’or di anochi, y no tin anochi di condolencia prome. Pues riba e mesun diasabra, tur cos ta tuma lugar.

REACCION

Impresionante ta e ola di reaccion cu a bin pa cu su morto repentino, no solamente na Aruba sino tambe internacional. Tur medio di prensa na Aruba y varios na Corsou a raporta e noticia lamentable aki den nan edicion di sea diamars mes (electronico) of diaranson den corant. Loke ta rednan social mes, tabata inmenso con amigonan di tur genero a dicidi di busca nan potretnan cu nan tabatin cu Ruben pa asina dun’e nan propio homenahe. Tur esaki ta mustra pues con ker’i e tabata pa un y tur. Mira e anuncio oficial AKI.