Knops impresiona cu su bishita na Filomena College y De Schakel

ORANJESTAD – Hopi impresiona ta loke cu secretario di estado Hulandes Raymond Knops a keda despues di su bishita diamars na dos scol di Aruba, De Schakel na Noord y Filomena College Mavo na San Nicolas. Asina e la bisa durante su conferencia di prensa diamars atardi. E mandatario a bishita e dos scolnan aki cu ta totalmente opuesto, tanto geograficamente como di tipo di alumno. “Nan a laga un impresion atras cerca mi” Knops a sigui bisa, argumentando cu despues di e bishita aki, e ta convenci cu futuro di Aruba ta uno excepcional y e por keda trankil. Su conviccion a bin despues di a topa e alumno y docentenan hopi motiva di ambos scol. “Nan (docentenan) ta bin hunto te hasta den fin di siman pa yuda e alumnonan logra nan meta estudiantil. Algo hopi positivo”, Knops a bisa, refiriendo aki na esnan cu ta bishita Filomena College Mavo na San Nicolas.

BISHITA

E mandatario a señala hopi similaridad na e dos scolnan ‘diferente’. “Claro cu (nan tin ) diferente background di con nan a cuminsa” Knops a bisa. “Pero e bunita ta cu ambos scol a demostra liderazgo di parti di e docentenan, y tambe alumnonan” Knops a sigui bisa, indicando pues cu aunke diferente, nan ta riba e mesun bon direccion. E mandatario tabata particularmente hopi impresiona di e hecho cu alumnonan ta bin bek den vakantie pa yuda. “Unda bo ta wak esaki? Na Aruba! Mi no ta wak esaki sosode asina lihe na Hulanda” Knops a bisa, den un forma di un compliment grandi, refiriendo na e alumnonan di Filomena College.

CONTRAST DI SCOL

Interesante ta keda e progreso cu e scol di ‘pariba’ vs esun di ‘pariba’ a conoce y cu porta por ta e splicacion cu toch aunke di background diferente, toch a haya hopi similaridad. De Schakel ta un scol cu ta conoci di tin un nivel di enseñansa semper hopi halto, dedica primordialmente na alumnonan di mayornan Hulandes mientras cu e otro scol (Filomena College) ,-cu den pasado tabata un di nan cu tabata ricibi alumnonan cu no por a logra otro caminda-, awor danki na motivacion di e docentenan a logra bolter e imagen ‘negativo aki’. Asina hopi te hasta, te na e punto cu e aña aki nan a sali (cifra ainda in oficial) e miho MAVO di Aruba. Asina nan a surpasa te hasta Mon Plaisir College cu ta considera pa hopi tempo e mihor di Aruba den cantidad di alumnonan cu a gradua.

SLAGINGS PERCENTAGE

Filomena College Mavo tin varios aña logrando un ‘slagings percentage’ di riba 80%, y e aña aki a logra e meta di 90% slagings percentage. Esaki ta un meta cu e ex docente di e scol, actual parlamentario Sue Ann Ras, a inculca den e alumnonan for di algun aña pasa. Contra tur expectativa, el a cuminsa motiva e alumnonan cu nan sigur por logra esaki. Hunto cu e otro docentenan (inicialmente tabatin hopi duda), a haci todo por todo, pa por a logra cu e alumnonan a kibra e ‘stigma’ di ta bin di un scol di ‘pariba’ cu ta menos bon cu esunnan di pabou. Y e aña aki, Filomena College a logra e meta cu Ras a pone su dilanti algun aña caba. Net e aña aki Ras e no ta na e scol mas debi cu e la asumi su funcion nobo di parlamentario aña pasa November. Pero sigur por bisa cu ta su meta a keda logra. No ta sorpresa tampoco e ora, cu e (Ras) ta un di e oradornan invita durante e celebracion di diploma na Renaissance Convention Center diaranson anochi, cu e tema di Hollywood night. Potretnan cortesia VNO Aruba.