DOW: Ta cera cruzada na Tanki Leendert pa traha rotonde

ORANJESTAD – Despues di 9’or di mainta diahuebs, ta cera e cruzada na Tanki Leendert pa cuminsa construccion di un rotonde. E rutanan lo wordo anuncia y indica pa medio di borchi. A yega na e punto unda cu tin cu pega varios caminda riba e sistema di trafico pa cu Watty Vos Boulevard. Contrario na esun na ex Codemsa, unda cu a traha un rotonde provisorico sin problema, mester ‘stroba’ trafico na altura di Tanki Leendert. E ta duna DOW hopi reto pa e trafico.

RETO

Lo tin hopi molester pa e becindario, pa cual a pidi comprension pa 3 luna cu ta e tempo cu lo dura pa e trabou tuma lugar. A scohe pa haci esaki den vacantie grandi pa evita mas molester posibel. Lo vigila e ruta alternativa pa wak si tin cu adapta e situacion di trafico. Un otro punto ta cu mirando cu vacantie di scol ta cuminsa, e contratista a opta pa drecha caretera esun na Frans Figaroa na luz di trafico noord, pa Montaña, cu ta wordo cera 7’or di mainta, y despues di esey, ta haci investigacion di e fundeshi di e caminda pa despues asfalte. Dentro di dos siman lo keda cla cu e stretch di lus di trafico Noord pa Fermins bar. Lo cera caminda entre 7’or di mainta pa 6’or di atardi. A dicidi pa hacie asina pasobra anochi no por midi e efecto di e caya, segun director di DOW, Marlon Croes.