Ecotech: No mester paga dobbel si e ta uza Ecotech pa recoge sushi

ORANJESTAD – E compania di priva di e.o. recoge sushi, Ecotech a ‘kibra silencio’ riba e asunto di Serlimar su cobranza pa recoge sushi. Por lo menos ‘indirecto’. E compania a pone un aviso den medionan di comunicacion diaranson (incluyendo NoticiaCla), informando cu ‘como ciudadano bo tin pleno derecho di sigui disfruta di nos servicio sin paga dobbel’. Pues contrario na loke cu gobierno (lesa: Otmar Oduber) ta bisa, esta cu cu pa ley bo ta obliga di paga pa e servicio di Serlimar, aunke cu bo ta usando otro servicio. Motibo cu a pone e aviso aki, NoticiaCla a compronde, ta cu Serlimar lo ta pasando cas pa cas e dianan aki , bisando hendenan cu nan tin cu paga doble y cu no por uza Ecotech. NoticiaCla mes no a logra verifica esaki ainda.

SPECULACION

Como tal EcoTech a pone un aviso cu ta bisa cu ‘contrario na tur speculacion y comentario den prensa, servicio residencial di Ecotech ta legalmente permisibel y cu ningun momento mester cambia of renuncia di Ecotech pa otro servicionan estatal’. E parti cu ta haci mencion cu ‘no ta obliga pa paga dobbel’, ta ‘basa riba opinion huridico solido y fuerte’.

REUNION DEN PARLAMENTO

Mientrastanto ta conoci cu diahuebs mainta 10’or Parlamento ta trata e topico aki den un reunion publico, esta e asunto di cobranza di sushi residencial door di Serlimar.