Mi recuerdo di mi amigo y colega Ruben Trapenberg

Awe nos ta dera un amigo y colega stima den mundo di periodismo y farandula. Den siman mi a traha un recuerdo di mi amigo Ruben Trapenberg. E prome reaccionan riba e articulo tabata inmenso y hopi conmovedor. Danki pa esey. Awe, riba e dia tristo, mi kier a ripiti e recuerdo. Asina por lo menos, mi por comparti loke e la significa. 

Mi prome recuerdo di Ruben Trapenberg, tabata mas cu 25 aña pasa, si no ta mas!

E tempo ey ‘ainda’ e tabatin su cabey largo, estilo rokero. Su nomber artistico tabata Ruben Traxx. Cu su dos ora di programa di rock na Canal 90, e tabatin e autoridad riba e genero di musica ey. Ta na Canal 90 nos a bira colega y amigo...bon amigo. Nos a click mesora y a ripara cu nos tabatin un nivel diferente di comunica cu otro. Un nivel basta halto, un nivel unico. Te ora cu el a join ATV, pa bira e presentador di noticia principal, Ruben a cambia di imagen; corta cabey y bira e ‘homber serio’ di noticia. Por lo menos na television.

Ami tabata presenta noticia na Telearuba hopi mas tempo caba y asina nos a bolbe bira colega, pero e biaha aki di television. Musicalmente tambe nos tabatin interaccion. Ora cu el a presenta su tema ‘Wok’ den Calypso y Roadmarch como Mighty Hippy, mi a bis’e: “Ruman, di bo e ta. Mi sa!” Su contesta tabata: “Tito, serio? Bo ta kere?

Y asina Ruben a bay cu e titulo e aña ey. Tabata na 2009 cu Telearuba a ofrece mi (mi tabata na ATV e tempo ey y el a bay Telearuba), un oportunidad unico pa cuminsa un programa ‘talk show’ estilo Pauw & Witteman: un concepto hopi popular na Hulanda. E director di Telearuba e tempo ey, un Hulandes, Joop Raasveld, no tabata conoce mi, pero a djis tende di mi y a bisa mi: “Nan a bisa mi, cu abo mester ta aden. Y bo co-host lo ta Ruben Trapenberg.”

Aki nos a uni pa prome biaha den un programa nobo. Nos estilo tabata asina unico, cu nos tabata complementa otro, sin cu tabatin hopi trabou pa haci. Unda cu ami tabata para, e tabata sigui y visaversa. E kimica tabata asina special, cu rapidamente e programa a bira e programa mas mira na television local. Y durante e campaña electoral di 2009, esaki a bira ‘E programa’ pa wak.

Ruben semper tabata mas critico cu mi, pasobra e tabata wak den mi, un clase special. Y visa versa. Nos nivel di combersacion tabata otro, diferente. Nos por a bisa otro kico cu ta, sin rabia cu otro. Nos tabata ‘keep each other honest y down to earth’. Ora cu NoticiaCla a bin, e tabata e critico mas severo, pero tambe mas complaciente. Su input tabata instrumental pa e exito di NoticiaCla. Semper, semper, nos tabatin un relacion diferente. Unda cu nos topa, kico cu nos haci. Durante su ultimo trabounan durante eleccion, particularmente durante e debatenan, unda cu el a fungi como moderador, mi tabata haya mensahe pa conseho. “Ruben, lebumay e cos ey. Haci tal” y e tabata cumpli. Y despues e no por a warda riba e encuestanan di NoticiaCla, pa haya sa con e debatenan tabata. Un di su ultimo entrevistanan televisa tabata cu mi riba e tema di e encuesta cu NoticiaCla tabata haci. Su preguntanan semper al caso. Despues cu el a bira malo, nos no a comunica hopi mas, pero asina cu el a bolbe, nos tabata comunica hopi cu otro. Te na ultimo, diasabra ainda nos tabata debati fuerte riba e tema di Serlimar. Despues di un bay bin, na final nos tabata di acuerdo riba nos pensamento. Nos a termina e combersacion diasabra merdia, sin sa cu esey lo a bira e ultimo biaha cu nos lo a papia cu otro. Ta hopi tempo cu morto di un persona no a afecta mi asina. Mi consuelo ta e cantidad di mensahe ricibi, e forma con tur hende ta papia di dje, y cu el a haci sigur un impacto riba hopi hopi hende. Esey kiermen cu e tabata un hende respeta y stima. Cu morto di Ruben, mi a perde un persona critico fuerte, un amigo di confianza y un colega stima. Ruben, awor bo ta na un miho luga. Please sigui guia mi di ayariba. Mi ta conta cu bo semper!

Tito Laclé, NoticiaCla