Knops: Ta na gobierno pa convence parlamento di contenido di protocol

ORANJESTAD – Mientras cu parlamento ta haya inspraak pa haci cambio na e protocol nobo pa supervision financiero di Aruba, unabez cu nan haci e cambionan, gobierno Hulandes lo analisa si nan por biba cu e cambionan. Y ta keda na gobierno di Aruba pa bende e contenido di e protocol entre Aruba y Hulanda riba e supervision financiero na Parlamento. Asina secretario di estado Hulandes pa Asuntonan di Reino, Raymond Knops a bisa NoticiaCla diamars atardi durante un conferencia di prensa.

ESPACIO PA ‘CAMBIO’

A puntra e mandatario cuanto ‘espacio’ Parlamento di Aruba tin pa haci cambio den e protocol unabez cu e haya e contenido. E hecho cu Knops mes tabata parlamentario pa 12 aña largo, ta pone cu e ta duna nan hopi balor segun su comentario na e portal aki. Unabez cu Hulanda haci palabracionnan final cu Aruba (cu ainda no ta e caso segun Knops), e ta asumi cu parlamento lo a wordo envolvi tambe.

PALABRACION

Pa clarificacion, Knops a bisa cu ta na gobierno di Aruba pa hunto cu Hulanda (via Knops) haci palabracionnan. “Con parlamento (di Hulanda) ta wordo envolvi, ta keda responsabilidad dimi (pa Hulanda). (Mescos) ta cu mi no ta bay mete den e forma con gobierno di Aruba envolve parlamento di Aruba”, Knops a sigui bisa. A confirma tambe cu ta pesey, no tin un acuerdo final entre Aruba y Hulanda, pasobra segun Knops, gobierno di Aruba kier envolve parlamento di Aruba tambe. Pero Hulanda te cu awor, si ta cla pa firma, y ta wardando riba Aruba. Durante su bishita cortico, e la sinti tambe di e parlamentarionan cu el a papia cune (AVP y MEP) cu nan kier participacion den e decisionnan aki.

DECISION FINAL

Knops a bisa tambe cu e tabatin bon combersacion cu tanto prome minister di Aruba y minister di finanza y ta keda na nan pa discuti e (protocol) interno. “Y mi tin bon speranza cu e puntonan razonable cu nos a discuti, cu parlamento lo compronde esaki tambe y sostene esaki tambe” Knops a sigui bisa. E ta deduci esey tambe di e combersacionnan cu e la tene durante su bishita. “Ta keda na parlamento pa analisa esaki”, e mandatario ta sigui bisa. “Pero, mes momento, ta trabou despues di gobierno (di Aruba) pa discuti esaki e ora cu mi, pa wak si esaki por conclui na palabracionnan definitivo” Knops a bisa finalmente.