ATIA ta lamenta accion di douane henter mainta diamars

ORANJESTAD - Awe mainta Douane, pa motibo di malcontento, a dicidi reuni durante ora di trabou pa asina ricibi atencion di minister di Finanzas. ATIA den un comunicado diamars atardi a bisa cu atrobe nan ta asombra con facil ta gara e arma di “reuni” of “strike” pa pone forza na exigencianan, sin tene cuenta na e daño cu ta wordu hasi na comercio, consumidor I henter economia di Aruba.

BARCO DI CONTAINER

E “reunion” ta wordu programa exactamente ariba e dia cu e barco di container principal ta yega for di Miami, hasiendo e daño maximo na comercio di Aruba. Nos ta enfrentando caba cierto retonan cu productividad serio cu bahamento di container cu gobierno ta poniendo prioridad pa trata na soluciona.

DAÑO IRREPARABLE

Tur sindicato tin derecho pa pone forza y exigi atencion ora esaki ta necesario, pero gara e hacha di para trabao, cortando adernan principal di economia di Aruba, ta un arma cu mester wordu uza cu hopi cautela mirando e daño irreparable cu ta causa na nos pais.

PREOCUPACION

ATIA a expresa un vez mas su preocupacion pa e acto di awe mainta y preocupacion pa su consecuencia. Tene henter un pais rehen pa pone forza pa negocia, ta mustra di ta un actitud cu e exigencia semper mester wordu cumpli cune of ta hasi mas daño na economia?