Ministerio Publico a dicidi cu ta investiga fraude Arubus

ORANJESTAD – Ministerio Publico a dicidi cu ta investiga e supuesto caso di fraude cometi na Arubus. Vocero di Ministerio Publico, Ann Angela a confirma diaranson mainta na NoticiaCla.com cu e Ministerio Publico, despues di a considera e peticion di recherche, cu a duna e orden bek na polis pa haci investigacion completo cu tur su consecuencia. Esaki kier men cu Ministerio Publico a deduci cu e caso merece un investigacion.

Tabata algun siman, manera cu NoticiaCla.com a raporta, cu recherche envolvi cu e investigacion di e caso di fraude na Arubus, a entrega keho oficialmente na Ministerio Publico. E aangifte di Arubus a yega OM siman pasa dialuna, segun vocero di Ministerio Publico Ann Angela mes a confirma na NoticiaCla.com diahuebs siman pasa. El a confirma tambe cu e fecha cu Arubus a entrega keho na recherche, tabata dia 24 di juli di e aña aki. “OM ta considerando ki pasonan ta bay tuma (pa loke ta e investigacion)” Angela a bisa na tal occasion.

Ta trata di e caso cu a bira conoci algun siman pasa ora cu e compania di transporte publico Arubus a nota cu un suma cuantioso di placa a disparce di nan cuenta bancario, y cu esaki a resulta te na China. Un supuesto caso di hacking a tuma lugar cu a pone cu mester a actua mesora pa recobra e suma grandi aki. Manera ta conoci, a toca e director mes e.o. pa biaha rapidamente pa China pa sigui e proceso formal di e pais ey, pa logra recobra e suma, cual a keda logra tambe.

Dos siman pasa durante conferencia di prensa di Arubus, a informa cu contrario na loke a kere, no mester a entrega keho na Ministerio Publico mes, sino na polis. Polis na su turno, si tabata necesario, lo a entrega un keho na Ministerio Publico, cu tin cu dicidi si nan ta prosegui cu e investigacion. Esey a tuma lugar y awor Ministerio Publico a dicidi pa sigui cu e caso. Arubus mientrastanto su investigacion interno tambe ta continua.