No obstante contesta di minister, MEP kier reunion riba Serlimar

ORANJESTAD – No obstante e carta di contesta den fin di siman y un splicacion amplio despues dialuna di minister Otmar Oduber riba e cobranza pa sushi door di Serlimar, fraccion di MEP no a keda satisfecho y a pidi un reunion publico cu ‘caracter di urgencia’   dialuna, pa reuni cu e minister concerni. Y si tabatin cualkier duda riba e urgencia, a haci un ‘apelacion’ pa e reunion aki tuma lugar prome cu recess. Recess di parlamento ta entre 9 di juli pa 15 di augustus proximo. Pues e reunion mester tuma lugar e siman aki. Problema ta cu e presidente Ady Thijsen no ta na Aruba ainda y e vice presidente ta di e partido di Oduber. Thijsen ta poni pa yega Aruba diamars, y e ora lo haya sa si e reunion enberdad ta wordo yama of no.

PREGUNTA

Tabata durante riba e conferencia di prensa dialuna mainta di e fraccion heel, cu lider di e fraccion Rocco Tjon a mustra su preocupacion ainda cu e tin. E ta primordialmente riba e placa cu ya caba parlamento a aproba riba e presupuesto di 2018 pa Serlimar. Y e pregunta di Tjon ta cu cu si ya caba a aproba e suma pa e aña aki, pakico ta forza pueblo paga e aña aki caba pa algo cu ta ‘cubri’ caba. Oduber durante un conferencia di prensa a contesta e pregunta ey, indicando cu ta responsabel pa Parlamento ta prepara y tin placa disponibel. Y si keda cla prome, ta scapa e suma den sentido cu no mester gasta e suma ey mas. Pero por lo pronto e suma ta sigura ‘just in case’. Segun Oduber, Gobierno anterior tabata pone suma di 16 miyon riba presupuesto, siendo cu e gastonan tabata 22 pa 23 miyon. Pues no tabata pone suficiente placa. A pone e placa aki awor, y si dado caso a logra cu e cobransanan, gobierno a spaar e placa riba presupuesto e ora. Problema cu hopi tin, ta cu di experiencia e placa aki e ora no ta realmente ‘gespaard’ sino mas bien ta usa e placa aki pa otro metanan y gastonan cu no ta forma parti di e presupuesto”. Algo cu den pasado a sosode caba. Y aparentemente esey ta e miedo cu hopi parlamentario tin.

OFFGUARD

Manera cu e portal aki a raporta diadomingo, e fraccion heel no a keda contento cu nan no tabata informa cu e anuncio ‘sorpresa’ di Oduber diabierna mainta. Mesora merdia a manda un lista di 11 pregunta pa Oduber, cu a contesta esaki den weekend mes. Fraccion di MEP no a gusta e contestanan y a pidi un reunion cu e mandatario. Oduber a mustra e fraccion cu nan tabata na altura, tabata participe den reunionnan anterior riba e tema, y cu conseho di minister a aproba e plan aki diamars siman pasa. E mandatario no por a bisa e portal aki cua minister tabata presente, y cu e no ta relevante. Hecho ta cu Oduber ta considera cu e fraccion mester tabata na altura. Algo cu obviamente no tabata e caso, pero Oduber a bisa claramente cu esey no ta su fout. Lesa e carta pa e reunion solicita AKI.